ചുരുള്‍

കൂട്ടിനൊരാള്‍

2011-04-30T14:42:00.012+05:30

ആദ്യം ലഡു പൊട്ടിയത് ഒരു വര്ഷം മുമ്പാണ്.ഏതൊരാണിനെയും പോലെ കല്യാണവും കുടുംബവുമൊക്കെ മരുപ്പച്ച പോലെ ദൂരെയെവിടെയോ ഒരു പൊട്ടായി കാണുന്ന നാളിലാണ് വീട്ടില്‍ നിന്നും ഒരത്യാവശ്യ കോള്‍.നല്ല ഒരു കുടുംബത്തില്‍ നിന്നും വളരെ നല്ലൊരു ആലോചന വന്നിട്ടുണ്ടെന്ന്.പെട്ടെന്ന് കേട്ടപ്പോ ഇറക്കണോ തുപ്പണോ എന്നറിയാത്ത അവസ്ഥ.ഒടുവില്‍ വരുന്നിടത്ത് കാണാം എന്ന് വെച്ച് ഇറക്കാന്‍ തന്നെ തീരുമാനിച്ചു.ആദ്യമായി സ്കൂളില്‍ പോയപ്പോഴും ആദ്യമായി പരീക്ഷ എഴുതിയപ്പോഴും ആദ്യമായി ഒരു പെണ്ണിനോട് ഇഷ്ടമാണെന്ന് പറഞ്ഞപ്പോഴുള്ള ഒരു തരാം അങ്കലാപ്പുണ്ടായിരുന്നു.ഇങ്ങനെ യാതൊരു വിധ പ്രശ്നങ്ങളുമില്ലാതെ തണുത്ത നെന്ചോടെ ഞങ്ങള്‍ വീടുകാരെല്ലരും കൂടെയായിരുന്നു പെണ്ണുകാണല്‍ യാത്ര.തികച്ചും ഒരു ഉല്ലാസ യാത്ര.മുമ്പ് ഉപ്പ അവിടെ ഒരു സൌഹൃദ സന്ദര്‍ശനം നടത്തിയത് കൊണ്ട് വഴിയറിയാന്‍ ബുദ്ധിമുട്ടിയില്ല.
എന്നാല്‍ വെളിമുക്കിലെക്കുള്ള ഞങ്ങളുടെ ആ യാത്ര ലക്ഷ്യത്തിലേക്കടുക്കുന്തോറും അടുത്തുള്ള പള്ളിയിലെ മൂത്രപ്പുരയിലൊന്ന് കയറണമെന്ന് തോന്നിതുടങ്ങിയപ്പോ ഞാന്‍ അറിഞ്ഞു , സംഗതി ടെന്‍ഷന്‍ കയറാന്‍ തുടങ്ങിയെന്നു.ഓഫീസില്‍ ഡ്രസ്സ്‌ കോഡ് ഒരല്പം പോലും പാലിക്കാതെ എന്തെന്കിലുമൊക്കെ വാരി വലിച്ചിട്ട് ഓടിപ്പോകുമായിരുന്ന എനിക്ക് ഷര്‍ട്ടും പാന്റും കൂടെ പിടി വലി നടത്തി എന്നെയാകെ അസ്വസ്ഥപ്പെടുതുന്നതായി തോന്നി.
ഒടുവില്‍ അവിടത്തെ പടി ചവിട്ടാന്‍ കഴിയാത്ത വിധം ഒരു വിറയലും.അടുത്തുള്ള അനിയനെ മുറുകെ പിടിച്ച് പരീക്ഷക്ക്‌ അറിയാത്ത കുറെ ചോദ്യങ്ങള്‍ക്ക് മുന്നില്‍ അറിയുന്ന കുറെ ചിന്തകളിലേക്ക് കടന്നു പോകുന്ന പോലെ മറ്റെന്തൊക്കെയോ ആലോചിച്ചു.ഒടുവില്‍ എന്റെ സമയമെത്തി.ഉള്ളില്‍ നിന്നും താത്ത എന്നെ വിളിച്ചു,ഒന്ന് കണ്ടോ അവളെ എന്ന്.എന്താന്നറിയില്ല എവിടെ നിന്നോ കിട്ടിയ ഊര്‍ജം സംഭരിച്ചു ഞാന്‍ ആ റൂമിലേക്ക്‌ പതിയെ നടന്നു.അപ്പൊ എന്റെ ഷര്‍ട്ടും പാന്റുമോന്നും എന്നെ ഉപദ്രവിച്ചില്ല.മുടി അല്പം ചുരുണ്ടോ എന്ന് മനസ്സില്‍ കരുതിയില്ല .
അവള്‍ അവിടെ ഉണ്ടായിരുന്നു,അകത്തെ മുറിയില്‍.ചുരിദാറും വട്ടത്തില്‍ ചുറ്റിയ തട്ടവുമാണ് ആദ്യം കണ്ടത്.പിന്നെ പതിയെ ആ മുഖത്തേക്ക് നോക്കി,ഒന്ന് ചിരിച്ചു.അവളുടെ ചിരി കണ്ടപ്പോഴാണ് നാണത്തിന്റെ കാര്യത്തില്‍ ഞാന്‍ എത്രയോ ഭേദമാണെന്നറിഞ്ഞത്.ധൈര്യത്തോടെ തലേന്നാള്‍ ഉണ്ടാക്കി വെച്ച ചോദ്യങ്ങളിലേക്ക് ഓര്‍മ്മയെ മെല്ലെ പുറകോട്ടടിച്ചു.പടച്ചോനെ,ഒരു വെള്ള പേപ്പര്‍ മാത്രമാണല്ലോ മുന്നില്‍.എന്ത് ചോദിക്കും.തലയും ഉടലും പുകയാന്‍ തുടങ്ങി. പിന്നെയും കുറെ നേരം ചിരിച്ചു.ഞങ്ങളുടെ സമയം കഴിയാറായെന്ന് തോന്നിയപ്പോ ഒരൊറ്റ ചോദ്യം: അവളേറ്റവും കൂടുതല്‍ തവണ കേട്ട ചോദ്യം തന്നെ വീണ്ടും കേട്ടു,ഒന്നു കൂടെ...."എന്താ പേര്"..ഉത്തരം എനിക്കറിയാവുന്നത് കൊണ്ട് അവള്‍ പറഞ്ഞത് ഞാന്‍ കേട്ടില്ല.
പിറ്റേന്ന് അങ്ങോട്ടും ഇങ്ങോട്ടും ഇഷ്ടപ്പെട്ട സ്ഥിതിക്ക് തല്‍ക്കാലം ഞങ്ങള്‍ ഉറപ്പിച്ചു വെച്ചു,എപ്പോഴാണ് ചിലര്‍ പറഞ്ഞ പോലെ കണ്ണ് പൊട്ടുന്ന ആ ദിനമെന്നറിയാതെ ഞാന്‍ കാത്തിരിക്കാന്‍ തുടങ്ങി.

കൃത്യം 11 മാസവും 13 ദിവസവും ഇടക്കെപ്പോഴെങ്കിലുംമുള്ള ഫോണ്‍ വിളിയുമായി കഴിഞ്ഞു കൂടി.ഒടുവില്‍ നിക്കാഹ് നടത്താന്‍ തീരുമാനമായി.നിക്കാഹിനും കല്യാണത്തിനുമിടയിലെ ചില സ്വപ്നങ്ങളുമായി നടക്കെയാണ് രണ്ടാം ലഡു പൊട്ടിയത്.അതും ഒരു ഫോണ്‍ കോളില്‍.നിക്കാഹ് കല്യാണമാക്കണമെന്ന ശക്തമായ സമ്മര്‍ദ്ടമുണ്ട്ത്രേ.പിന്നെയും ചിന്ത...തുപ്പാണോ...ഇറക്കണോ..ഒടുവില്‍ അതും ഇറക്കി....

രണ്ടു ലഡുവുമായി ഞാന്‍ കുറെ കാലത്തിനു ശേഷം ബൂലോകത്ത് മടങ്ങിയെത്തുന്നത് ആ സന്തോഷ വാര്‍ത്ത ബൂലോക നിവാസികളെ അറിയിക്കാനാണ്..ഈ വരുന്ന മെയ്‌-8 നു വളരെ വലുതും വളരെ ചെറുതുമല്ലാത്ത ഒരു പരിപാടിയില്‍ എന്റെ കല്യാണം നടക്കുകയാണ്.അന്ന് രാവിലെ ഒരു പത്തര-പതിനൊന്ന്-പതിനൊന്നരക്ക് വീട്ടിലെത്തിയാ ഒരു കോഴിക്കോടന്‍ ബിരിയാണിയും കഴിച്ചു എന്റെ നിക്കാഹില്‍ പങ്കെടുക്കാന്‍ മലപ്പുറം ജില്ലയിലെ വെളിമുക്കിലേക്ക് പോകാം.ചില മലപ്പുറം വിഭവങ്ങളും ആസ്വദിക്കാന്‍ പറ്റുമാകും.
പ്രാര്‍ത്ഥനകളും പ്രാതിനിധ്യവും പ്രതീക്ഷിക്കുന്നു.
മുഫാദ്‌

പ്രഭാതം

ചേളന്നൂര്‍

കോഴിക്കോട്

ബൂലോക കല്യാണം

ഇത്തരമൊരു കുറിപ്പ് അനിവാര്യമാണെന്ന് തോന്നുന്നു.കാരണം ബൂലോകത്ത് സജീവമായി ഇടപെട്ടു കൊണ്ടിരിക്കുന്ന ഒരു കുടുംബത്തില്‍ നിന്ന് തന്നെ ഒരു പെണ്ണിനെ കിട്ടിയെന്നത് എന്റെ ഭാഗ്യമായി കരുതുന്നു.

നാളുകള്‍ക്കു മുന്നേ യാദൃശ്ചികമായി എന്റെ സുഹൃത്തായി മാറിയ റഹീസിനെ കുറിച്ച് മുമ്പ് എഴുതിയിരുന്നു'കാക്കപ്പൊന്ന്'' മായി ഇന്ന് ബൂലോകത്ത് സജീവമായി മാറിയ റഹീസിന്റെ അനിയത്തിയെ കെട്ടുമ്പോ ബ്ലോഗ്ഗെഴുതുന്നവര്‍ക്ക് പെണ്ണ് കിട്ടില്ലെന്ന് പണ്ട് വാഴക്കോടന്‍ പറഞ്ഞത് ബൂലോകകുടുംബതില്‍ നിന്ന് തന്നെ ഒരു പെണ്ണിനെ കിട്ടിയതിലൂടെ തിരുത്താന്‍ കഴിയുമെന്നു തോന്നുന്നുന്നു.

ഇനി ഒരിടവേള

2010-07-20T12:23:00.003+05:30

ഒരു നീണ്ട ഇടവേള ബൂലോകത്ത് നിന്നും.

കി.നാക്കോ : ആഘോഷത്തിന്റെ രാവുകള്‍

2010-07-12T14:32:00.012+05:30

അങ്ങനെ ആ ടെന്ഷനുമങ്ങ് ഒഴിഞ്ഞു കിട്ടി.തിളയ്ക്കുന്ന കട്ടന്‍ ചായയില്‍ അടയുന്ന കണ്ണുകളെ പിടിച്ചു നിര്‍ത്താനുള്ള പോരാട്ടങ്ങള്‍ക്ക് ഫൈനലോടെ അവസാനമായപ്പോള്‍ ഇനി ഒരു നാല് വര്‍ഷത്തെ കാത്തിരിപാണ്.ചില കാഴ്ചകളുണ്ട്‌ മനസ്സില്‍ തങ്ങി നില്ക്കുന്നവ.
അര്‍ജെന്റിന ,മറഡോണ ,മെസ്സി :
മനസ്സിനെ ഇപ്പോഴും അലട്ടിക്കൊണ്ടിരിക്കുകയാണ് ആ ദൃശ്യങ്ങള്‍.ജെര്‍മ്മനിയുടെ പ്രത്യാക്രമണങ്ങളില്‍ അര്‍ജെന്ടീനയുടെ വിഖ്യാത നിര വിരങ്ങലിച്ചപ്പോള്‍ ഒരു മരവിപ്പായിരുന്നു മനസ്സില്‍. 1994-ലെ
മറഡോണ യുടെ പുറത്താകല്‍ മുതല്‍ കാണാന്‍ തുടങ്ങിയതാണ്‌ ലോകകപ്പ്‌ ഫുട്ബാളിന്റെ ആരവങ്ങള്‍.അന്ന് മുതല്‍ നീലയും വെള്ളയും വര മൈതാനത് ഓളം തീര്‍ക്കുമ്പോള്‍ വല്ലാത്തൊരു ആവേശമാണ്. കാരണങ്ങള്‍ ഒരുപാടുണ്ടെങ്കിലും പുറത്തായപ്പോള്‍ രണ്ടു ദിവസം വീട്ടില്‍ അടങ്ങിയിരിക്കുകയല്ലാതെ ഒന്നും മിണ്ടാന്‍ കഴഞ്ഞില്ല.
പ്രതിഭയുടെ മിന്നലാട്ടങ്ങള്‍ കണ്ടു മെസ്സിയുടെ കാലുകളില്‍.പക്ഷെ ശരിയായ പൊസിഷനില്‍ കളിക്കാന്‍ കഴിയാത്തതിനാല്‍ ആ പ്രകടനം പ്രതീക്ഷക്കൊതുയര്‍ന്നില്ല.
ഈ ലോകകപ്പിന്റെ ഏറ്റവും ദയനീയ കാഴ്ച അര്‍ജെന്ടീനയുടെ നിസ്സഹായത തന്നെ.
സാംബാ താളം നിലച്ചപ്പോള്‍ :
അവസാന വിസില്‍ മുഴങ്ങിയപ്പോള്‍ ആഹ്ലാദം അണ പൊട്ടിയോഴുകുകയായിരുന്നു.പ്രകടനമായി ഞങ്ങള്‍ കുറെ പേര്‍ അങ്ങാടിയില്‍ ഒത്തു കൂടി.ഇങ്ങനെ ബ്രസീല്‍ തോല്കുമെന്നു ആരും കരുതിയിരുന്നില്ല.ഹോളണ്ട് പോലും.അധികം സന്തോഷിച്ചതിനാലാകാം കിട്ടി അടുത്ത ദിവസം തന്നെ,കൊട്ടക്കണക്കിനു.

വീഴ്ചകള്‍ :
കൊട്ടിഘോഷിച്ചു വന്നു വീണു പോയവര്‍ പലരായിരുന്നു.റൂണി ,ക്രിസ്റ്റിയാനോ,കാക്ക,ദ്രോഗ്ബ,ടോരെസ് ...ലോകകപ്പിന്റെ താരമാകാന്‍ വന്നു വീണു പോയ പേരുകള്‍ ഇനിയുമുണ്ട്.
ഒരു നിമിഷം പോലും പൊരുതാതെ കീഴടങ്ങിയ ഒരേയൊരു ടീമേ ഉള്ളു ഈ ലോകകപ്പില്‍.സിദാന്‍ പോയതോടെ പല്ല് കൊഴിഞ്ഞ ഫ്രഞ്ച് പട .
അവസാന കളിയില്‍ അവസാന നിമിഷങ്ങളില്‍ വല്ലാതെ പൊരുതിയെങ്കിലും ഇറ്റലിയും നിരാശപ്പെടുത്തി

ലൂസേര്‍സ് ഫൈനല്‍ :
അതായിരുന്നു യഥാര്‍ത്ഥ ഫൈനല്‍.ആക്രമണവും പ്രത്യാക്രമണവും മുഴുവന്‍ സമയവും നിറഞ്ഞു നിന്നപ്പോള്‍ ഉറക്കമോഴിച്ചത് ശരിക്കും മുതലായിപ്പോയി എന്ന് പറയാം.
ഓര്‍മ്മയില്‍ തങ്ങി നില്‍ക്കുന്ന മറ്റു ചില കളികളുമുണ്ട്‌ .
തുടക്കത്തിലേ വിരസതക്കൊടുവില്‍ നിലനില്പിനായുള്ള ഇറ്റലിയുടെ പോരാട്ടം കണ്ട ഇറ്റലി - സ്ലൊവാക്കിയ മത്സരം സംഭവ ബഹുലമായിരുന്നു.
ഗ്രീസ് - നൈജീരിയ ,യു എസ് എ - സ്ലോവാനിയ, ജപ്പാന്‍ - ഡെന്മാര്‍ക്ക് , കൊറിയ - ഉറുഗ്വായ്,ഉറുഗ്വായ് - ഖാന , ഖാന - യു എസ് എ , ബ്രസീല്‍ - ഹോളണ്ട് മത്സരങ്ങളും രസകരമായിരുന്നു .

ഫോര്‍ലാന്‍ :
അവസാന മത്സരത്തില്‍ ഒരു വശം തിരിഞ്ഞു ഫോര്‍ലാന്‍ നേടിയ ഗോള്‍ മതി പ്രതിഭയുടെ ആഴമളക്കാന്‍. ഫോര്‍ലാന്‍ നേടിയ ഗോളുകളെല്ലാം അസാധ്യമായ പൊസിഷനില്‍ നിന്നായിരുന്നു എന്നതും കഴിഞ്ഞ ലോകകപ്പിലെ സിദാന്റെ പ്രകടനം പോലെ ഒരു ടീമിനെ മുന്നില്‍ നിന്നും നയിച്ച്‌ സെമി വരെ എത്തിച്ചതും സുവര്‍ണ്ണ പന്തിന്റെ യഥാര്‍ത്ഥ അവകാശിയെ നമുക്ക് കാട്ടി തന്നു.

സുവാരസ്,അസിമാവോ ഗ്യാന്‍.
ഒരു വില്ലന്‍ ഒറ്റ നിമിഷംകൊണ്ട് നായകനാകുന്നതും ഒരു നായകന്‍ ഒറ്റ നിമിഷംകൊണ്ട് വില്ലനാകുന്നത് ഖാന - ഉറുഗ്വായ് ക്വാര്ട്ടരിന്റെ അവസാന നിമിഷം നാം കണ്ടു.ഗോളെന്നുറച്ച ഷോട്ട് കൈ കൊണ്ട് തട്ടിയിട്ടു സുവാരസു വില്ലനായെന്നു തോന്നിച്ച ഖട്ടത്തില്‍ കിട്ടിയ പെനാല്‍റ്റി പുറത്തെക്കടിച്ച ഗ്യാന്‍ വില്ലന്‍ പദവി സുവാരസില്‍ നിന്നും ഏറ്റെടുക്കുകയായിരുന്നു.
പെനാല്‍റ്റി ഷൂട്ടൌട്ടില്‍ ഖാന പുറത്തായപ്പോള്‍ ഒരു വന്‍ കരയുടെ സ്വപ്നം അവിടെ കേട്ട് പോകുകയായിരുന്നു.

വുവുസേല , ജബുലാനി
കടല്‍ വണ്ടിന്റെ ഈ മൂളിച്ച ചെവിയില്‍ തുളച്ചു കയറിയപ്പോള്‍ വല്ലാത്ത അസഹനീയത ആയിരുന്നു.പിന്നെ അതൊരു ശീലമായപ്പോള്‍ ഇനി വുവുവ്സേല ഇല്ലാതെ
കളി കാണാന്‍ കഴിയില്ലേ എന്ന് തോന്നിപ്പോകുന്നു.
അടിച്ചിടതെക്ക് കയരിപ്പോകാത്ത പന്ത് ആണത്രേ അത്. ഇംഗ്ലണ്ട് -യു എസ് എ മത്സരത്തില്‍ ഗോളിയുടെ കയ്യില്‍ കിട്ടിയ ബോള്‍ വളക്കുള്ളിലേക്ക് വഴുതിപ്പോയപ്പോള്‍ ജബുലാനി യെ കുറ്റം പറയാന്‍ തുടങ്ങി പലരും. ഗോളിയെ മാറ്റിയെങ്കിലും ജെര്‍മനിക്ക് മുന്നില്‍ ഇംഗ്ലണ്ട്ഇന്റെ കഥ കഴിഞ്ഞു.

ഒരു കറുത്ത ഞായര്‍ :
റഫറിയിങ്ങിലെ അപാകതകള്‍ കൊണ്ടാണ് ആ ഞായര്‍ ശ്രദ്ധിക്കപ്പെട്ടത്.ലാംപാര്‍ഡിന്റെ അത്യുഗ്രന്‍ ഷോട്ട് ഗോളായിട്ടും റഫറീ കാണാതിരുന്നപ്പോള്‍ കളിയുടെ ഗതി തന്നെ മാറിപ്പോയി.ഇംഗ്ലണ്ട് തീരെ താല്പര്യമില്ലാത്ത ടീം ആണെങ്കിലും അന്നത്തെ കളി കഴിഞ്ഞപ്പോ എന്തോ ഒരു വിഷമമുണ്ടായിരുന്നു.
അതെ ദിവസം ടെവെസിന്റെ ഒരു ക്ലിയര ഓഫ് സൈട് ഗോള്‍ റഫറീ അനുവദിച്ചതും ഏറെ ചര്‍ച്ച ചെയ്യപ്പെട്ടു.

കൊറിയ , ജപ്പാന്‍
ഏഷ്യന്‍ ടീമുകള്‍ വീരോചിതം പൊരുതി. ഡെന്മാര്‍ക്ക്‌-മായുള്ള ജപ്പാന്റെ പോരാട്ടം അത്യുഗ്രന്‍ ദ്രിശ്യ വിരുന്നു തന്നെയായിരുന്നു . ഉറുഗ്വായുമായി നന്നായി കളിച്ചെങ്കിലും കൊറിയ തോറ്റത് നിര്‍ഭാഗ്യം കൊണ്ട് മാത്രമായിരുന്നു.

എന്റെ സ്വപ്ന ടീം
ഗോളി
റിച്ചാര്‍ഡ്‌ കിങ്ങ്സന്‍(ഖാന )

പ്രതിരോധം
രാമോസ് (സ്പെയിന്‍ )
പ്യുയോള്‍ (സ്പെയിന്‍ )
മൈകോന്‍ (ബ്രസീല്‍ )
വാന്‍ ബ്രോന്കൊസ്റ്റ് (ഹോളണ്ട് )-ക്യാപ്റ്റന്‍

മധ്യ നിര
ഇനിയെസ്റ്ട(സ്പെയിന്‍ )
സാവി (സ്പെയിന്‍ )
മുള്ളര്‍(ജെര്‍മനി )

മുന്നേറ്റ നിര
ഫോര്‍ലാന്‍ (ഉറുഗ്വായ് )
മെസ്സി (അര്‍ജെന്റീന )
വിയ്യ (സ്പെയിന്‍)

പാറുവമ്മയുടെ സങ്കടങ്ങള്‍

2010-06-10T23:30:00.000+05:30

മണ്ണില്‍ തളിര്‍ത്തവര്‍
മണ്ണില്‍ വളര്‍ന്നവര്‍
മണ്ണോടു ചേരാതെ
ഊരു വിട്ടോടണം.

കണ്ണീരു വറ്റാത്ത
പാറുവമ്മയ്ക്കുണ്ട്
ഉള്ളോട് ചേരുന്ന
നെല്ലിലും വയലിലും
തുടി കൊട്ടിപ്പാടാന്‍
ചില സങ്കടപ്പാട്ടുകള്‍.

വറ്റാല്‍ തിളക്കണം മണ്കലം-
കുത്തിയിരുന്നോരോ ഉരുളകള്‍,
ചൊല്ലണം പൊയ്കഥകള്‍.
മുടിയിഴകള്‍ നരകീറി
ഊര്‍ന്നു വീഴുമ്പോഴും
ശീലങ്ങള്‍ തെറ്റാതെ
തിരുകണം തുളസിയില.
ഇളകുമ്പോള്‍ കാലന്റെ
കാഹളം മുഴങ്ങുന്ന
ചായ്പിലെ കട്ടിലില്‍
ചാഞൊന്നുറങ്ങണം.
ഉള്ളപ്പോള്‍ പഴിയേറെ
കൊണ്ടുവെന്നാകിലും
പിള്ളേരെ അച്ഛനോടൊപ്പം
ഒടുങ്ങണം.

കൊടിയില്ല നിറമില്ല
അരിവാളിന്‍ മുനയില്ല.
ഒട്ടിയ വയറുണ്ട്,
ഒരു പിടി മണ്ണുണ്ട്.
ഭൂമിക്ക് നോവാതെ ഞങ്ങള്‍ നടന്നോളാം
വികസന ഭ്രാന്തിന്റെ
വയറുകള്‍
നിറയട്ടെ.

കിനാലൂരില്‍ നടക്കുന്നത്

2010-05-10T13:31:00.005+05:30

മോഹന്‍ലാലിന്റെ 'ഇവിടം സ്വര്‍ഗ്ഗമാണ്' എന്നാ ചിത്രത്തില്‍ ഭൂമാഫിയ ഒരു ഗ്രാമത്തെ ടൌണ്‍ഷിപ്പിന്റെ പേരില്‍ വശീകരിചെടുക്കുന്ന തന്ത്രം അതി മനോഹരമായി വരച്ചു വെച്ചിരുന്നു.സ്വര്‍ഗ്ഗ തുല്യമായ തന്റെ ഭൂമി ഒറ്റയാള്‍ പോരാട്ടത്തിലൂടെ മോഹന്‍ലാലിന്റെ കഥാപാത്രം വീണ്ടെടുക്കുവാന്‍ വേണ്ടി നടത്തുന്ന ചില ശ്രമങ്ങളിലൂടെയാണ് ചിത്രം വികസിക്കുന്നത്.കിനാലൂരിലെ കാഴ്ചകള്‍ക്ക് ചിത്രവുമായുള്ള ബന്ധം ഭൂമാഫിയയുമായി ബന്ധപ്പെട്ട ചില ചചുറ്റിക്കളികളുടെ വാര്‍ത്തകളാണ്.ചിത്രത്തില്‍ നിന്ന് വിപരീതമായി ഭരണ വര്‍ഗത്തെ ചില നാടന്‍ സഖാക്കളോഴികെ ഒരു നാട് മുഴുവന്‍ വികസനങ്ങളുടെ പേരിലുള്ള ഈ മുതലെടുപ്പുകളെ ശക്തിയായി എതിര്‍ക്കുമ്പോള്‍ ഭരണകൂടം പോലീസിനെ ഉപയോഗിച്ച് സമാധാനപരമായ പ്രതിഷേധങ്ങളെ തകര്തെരിയാനുള്ള ശ്രമങ്ങളാണ് നടത്തുന്നത്.

ജനകീയ ഐക്യ വേദിയുടെയും ജനജാഗ്രതാ സമിതിയുടെയും നേതൃത്വത്തില്‍ നടക്കുന്ന ഈ സമരത്തിന്റെ ആവശ്യകത തീര്‍ച്ചയായും പരിശോധിക്കപ്പെടെണ്ടത് തന്നെ. കിനാലൂരില്‍ എന്ത് സാധനമാണ് തുടങ്ങാന്‍ പോകുന്നത് എന്ന ചോദ്യത്തിന് ഒരു വ്യക്തമായ മറുപടി നല്‍കാന്‍ എളമരം സഖാവിന് ഇത് വരെ കഴിഞ്ഞിട്ടില്ലെന്നതന്നു കാതലായ ഒരു പ്രശനം.മലേഷ്യന്‍ കമ്പനിക്ക് വേണ്ടി സാറ്റ്ലൈറ്റ് സിറ്റിയാണ് വരാന്‍ പോകുന്നതെന്ന് ആദ്യം പറഞ്ഞു.പിന്നെ മെഡി സിറ്റിയാനെന്നായി.അവരുമായുള്ള കരാര്‍ കാലഹരണപ്പെട്ടപ്പോള്‍ ഫൂട്ട്വെയര്‍ പാര്‍ക്കാന് സ്ഥാപിക്കുന്നതെന്നു മാറ്റിപ്പറഞ്ഞു.ഇപ്പോള്‍ മന്ത്രി പറയുന്നത്‌ വ്യവസായ വകുപ്പിന്റെ 278 ഏക്കറില്‍ 78 ഏക്കര്‍ ഫൂട്ട്വെയര്‍ പാര്‍ക്കിനും 50 ഏക്കര്‍ കിന്ഫ്രാക്കും നീക്കി വെച്ചതാനെന്നാണ്.ബാക്കി 150 ഏക്കര്‍ കാണിച്ചാണ് നാലുവരിപ്പാതക്കായി മന്ത്രി വാശി പിടിക്കുന്നത്‌.ഇപ്പോള്‍ ഒരു ദുബായ്‌ കമ്പനിയുടെ പേര് കൂടെ പറഞ്ഞു കേള്‍ക്കുന്നു.പാര്‍ക്കിന്റെ കാര്യത്തില്‍ ഈയൊരു അനിശ്ചിതത്വം നിലന്ല്‍ക്കുമ്പോള്‍ നാലുവരിപ്പാതയുടെ കാര്യത്തില്‍ ഭരണകൂടം വാശി പിടിക്കുന്നതെന്താനെന്നതാണ് നാട്ടുകാര്‍ മൊത്തം ചോദിക്കുന്നത്. ജനകീയ ഐക്യ വേദി സമര്‍പ്പിച്ച ബദല്‍ പാതയെ പറ്റി ചര്‍ച്ച ചെയ്യാന്‍ പോലും അധികൃതര്‍ തയാറാകുന്നില്ല.താമരശ്ശേരി മലോറത്തു നിന്ന് ചുരുങ്ങിയ ദൂരം റോഡുന്ടാക്കുന്നതിനു പകരം നൂറു കണക്കിന് ഏക്കര്‍ വയലുകളും അറുനൂറോളം വീടുകളും തകര്‍ത്തു എന്തിന്നാണ് ഈ വികസനം എന്നത് കിനാലൂര്‍ നിവാസികളെ പോലെ നമ്മെയും ചിന്തിപ്പിക്കെണ്ടാതുണ്ട്.

ഇതിനിടയില്‍ എളമരം കരീമിന്റെയും ജില്ല കളക്റ്റരുടെയും പ്രസ്താവനകളിലെ വൈരുധ്യവും ചര്‍ച്ച ചെയ്യപ്പെട്ടു കഴിഞ്ഞു.നാല് വരിപ്പാതയുടെ അലൈന്മേന്റ്റ്‌ തയ്യാറായിട്ടില്ലെന്നും സാധ്യതാ പഠനം മാത്രമാണ് നടക്കുന്നതെന്നുമാണ് മന്ത്രി വാര്‍ത്താ കുറിപ്പില്‍ പറഞ്ഞത്.എന്നാല്‍ കേന്ദ്ര സര്‍ക്കാര്‍ ഇന്ടസ്ട്രിയല്‍ ഗ്രോസ് സ്കീമില്‍ ഉള്‍പ്പെടുത്തി 10 വര്ഷം മുമ്പ് കിനാലൂരിലെ ഭൂമി ഏറ്റെടുത്തതാണെന്നും അലൈന്മേന്റ്റ്‌ തയാറാക്കി അതില്‍ മാളിക്കടവ്-ചേളന്നൂര്‍-കാക്കൂര്‍-കിനാലൂര്‍ 26 കിലോ മീറ്റര്‍ റോഡു ഏറ്റെടുക്കാന്‍ ജില്ലാ ഭരണകൂടത്തിനു നിര്‍ദ്ദേശം നല്കിയതാനെന്നുമാണ് കളക്റ്റര്‍ പറയുന്നത്.ഇങ്ങനെ തികച്ചും നിഗൂഡമായ രീതിയിലുള്ള ചില സംഭവങ്ങളാണ് ജനങ്ങളെ സമര പദ്ധതിലേക്ക് അടുപ്പിക്കുനത്.

തങ്ങളെ മൊത്തം നേരിടുന്ന ഒരു പ്രശ്നമെന്ന നിലയില്‍ ഒരു നാട് മുഴുവന്‍ സമര രംഗത്തിറങ്ങിയപ്പോള്‍ 'ചാണക വെള്ള'മെന്ന അതിമാരകായുധം പ്രയോഗിച്ചത് 'മത മൌലിക വാദികളുടെ' കൂട്ടമാനെന്നും അവര്ക്ക് രാഷ്ട്രീയത്തിലേക്കുള്ള രംഗ പ്രവേശത്തിന് വേണ്ടിയാണിത് ചെയ്യുന്നതെന്നും മറ്റുമുള്ള വിഡ്ഢിത്തങ്ങള്‍ വിളിച്ചോതി സമരത്തെ സാമുദായിക വല്ക്കരിക്കാനുള്ള ശ്രമങ്ങളും ജനകീയ സമരങ്ങലോരുപാട് കണ്ടിട്ടുള്ളവരുടെ ഭാഗത്ത്‌ നിന്നുന്മുണ്ടാകുന്നു.

ഇപ്പോഴും കിനാലൂരിലെ ജനങ്ങള്‍ ജനങ്ങള്‍ ഭീതിയിലാണ്.രാത്രിയില്‍ പോലും പോലീസുകാരുടെ റോന്തു ചുറ്റലാണ് നാട് മുഴുവന്‍.150 പേര്‍ക്കെതിരെ വധ ശ്രമത്തിനു കേസെടുതാണ് പോലീസ് ഒരു ജനകീയ സമരത്തെ അടിച്ചമര്‍ത്താന്‍ ശ്രമിക്കുന്നത്.ഒരുപാട് സമരങ്ങള്‍ കണ്ട കേരളത്തിന്റെ മണ്ണില്‍ ഈ സമരവും ഒരു വിജയം തന്നെയാകുമെന്ന് നമുക്ക് പ്രതീക്ഷിക്കാം.അടുത്ത കാലത്തെ പ്ലാച്ചിമട,ചെങ്ങറ സമരങ്ങളുടെ വിജയം ഇവിടെയും ആവര്‍ത്തിക്കുമെന്ന് നമുക്ക് പ്രത്യാശിക്കാം.

'അങ്ങനെ എനിക്കൊരു സുഹൃത്തിനെ കിട്ടി'.

2010-05-03T16:38:00.000+05:30

ഒരു കിടപ്പില്‍ ലോകത്തെ മുഴുവനുമറിയുന്ന എന്റെ പ്രിയ സുഹൃത്ത്‌ റഈസ് വെളിമുക്കിന്...

ക്ലോറോഫോം മണക്കുന്ന ആ വരാന്താകള്‍ എനിക്കേറെ ഇഷ്ടമാണെന്ന് പറയേണ്ടി വരും.ഒരു ചെറിയ പനി വരുമ്പോഴേക്ക് കാളകളെക്കാള്‍ ഉച്ചത്തില്‍ അമറാന്‍ തുടങ്ങും.പിന്നെ ആശുപത്രിയുടെ പടി കണ്ടാലേ തന്റെ അലറല്‍ നിര്‍ത്തൂ.ഡോക്റ്റര്‍ സൂചി കുതിതാഴ്തുന്നത് കാണുമ്പോള്‍ വീണ്ടും കരച്ചില്‍ തുടരും .ചിലപ്പോള്‍ ഒരു അസുഖവുമില്ലെങ്കിലും ക്ലോരോഫോമിന്റെ മണവും നഴ്സുമാരുടെ കിന്നാരങ്ങളും കേട്ട് ആ ഇടനാഴികളിലെവിടെയെന്കിലും ചുറ്റി നടക്കും.

ചില വാതിലുകള്‍ക്ക് മുന്നില്‍ ഒരു നിമിഷമൊന്നു നില്‍ക്കും.അടക്കിപ്പിടിച്ച ചില കരച്ചില്‍ കേള്‍ക്കാം-ചിലപ്പോള്‍,കുഞ്ഞിക്കാല്‍ കണ്ട ചില ചിരികളും.എത്ര വേദനകള്‍ അടുത്ത് കണ്ടാലും അനുഭവിച്ചരിഞ്ഞാലും ജീവിതത്തെ ഒരു നിലയ്ക്കുമത് സ്വാധീനിച്ചില്ല.ഇപ്പോഴും ചെറിയ പനി അടുത്ത് കൂടെ പോകുമ്പോള്‍ അമറാന്‍ തുടങ്ങും.ചെറിയതലവേദന വന്നാല്‍ ചെയ്യുന്ന പണി നിര്‍ത്തി മടിയോടെ ഒരിടത് ചുരുണ്ട് കൂടും.

പ്രായത്തില്‍ ഇത്തിരിയും കാഴ്ചയില്‍ അതില്‍ ചെറുതുമായ ഒരു മനുഷ്യന്‍ മുന്നിലൂടെ വീല്‍ ചെയറില്‍ ചിരിച്ചു കൊണ്ട് കടന്നു പോയപ്പോള്‍ എന്തോ പെട്ടെന്ന് മനസ്സില്‍ നീറ്റല്‍ പോലെ.അടുത്ത റൂമിലേക്ക്‌ അവന്‍ കയറിപ്പോകും വരെ ആ വീല്‍ ചെയറിന്റെ ചലനം തന്നെ നോക്കി നിന്നു.അടച്ചിട്ട റൂമിന്റെ വാതില്‍ പതിയെ തുറന്നു ഞാന്‍ അകത്തു കയറി.അവിടെ കയറിയപ്പോഴേ എന്റെ നെഞ്ജിടിക്കാന്‍ തുടങ്ങി.നേഴ്സ് സൂചി അവന്റെ കയ്മുട്ടിലേക്ക് താഴ്ത്തിയിരക്കുകയായിരുന്നു.ഒരു ഭാവ വ്യത്യാസവുമില്ലായിരുന്നു അവനു.അതെ ചിരി വീണ്ടും ആ മുഖത്തു.ഉച്ചതിലൊരു കരച്ചില്‍ പ്രതീക്ഷിച്ചതിനാലാകാം നേഴ്സ് ചോദിച്ചത്-വേദന അടക്കിപ്പിടിച്ചതാണോ എന്ന്.നമ്മുടെ ഡിക്ഷ്ണറിയില്‍ അങ്ങനെ ഒരു വാക്കില്ലെന്ന അവന്റെ മറുപടി .

കയറിച്ചെന്ന ഉടനെ സലാം പറഞ്ഞു ഞാന്‍ എന്റെ കൈകള്‍ അവനു നേരെ നീട്ടി.അതെ ചിരിയോടെ അവന്‍ എനിക്കൊരു മറുപടി തന്നു-തല ഇളക്കി അവനെന്നോട് ഇരിക്കാന്‍ പറഞ്ഞു.കിടക്കയില്‍ മുഖമോഴികെ മൂടിപ്പുതച്ചു കിടക്കുന്ന സുഹൃത്തിനെ കണ്ടപ്പോള്‍ ഇരുളില്‍ മുങ്ങി പതിയെ ഉദിച്ചുയരുന്ന സൂര്യ രശ്മികളെയാണ് എനിക്കോര്മ്മ വന്നത്.

പിന്നെ അവന്‍ സംസാരിക്കാന്‍ തുടങ്ങി.ഒരു ചെറു ചിരിയോടെയുള്ള അവന്റെ ഓരോ വാക്കുകളും എനിക്ക് പുതിയൊരു സുഹൃത്തിനെ തരികയായിരുന്നു.സംസാരതിനിടയിലെവിടെയോ അവന്‍ തന്നെ പറ്റിയും പറയാന്‍ തുടങ്ങി.ചെറുപ്പത്തില്‍ സംഭവിച്ച ആക്സിടെന്റും അതില്‍ പൂര്‍ണ്ണമായി തളര്‍ന്നു പോയ തന്റെ ശരീരത്തെ കുറിച്ചും.പറയുമ്പോള്‍ തനിക്കെഴുന്നേറ്റു നടക്കാന്‍ കഴിയാത്ത ഭൂമിയുടെ താളങ്ങളും തൊട്ടറിയാന്‍ കഴിയാത്ത വായുവിന്റെ ചലനങ്ങളും അവന്റെ കണ്ണ് നിറക്കുമെന്ന് ഞാന്‍ കരുതി.പക്ഷെ തല മാത്രമിളക്കാന്‍ കഴിയുന്ന അവന്‍ ജീവന്‍ തുളുമ്പുന്നുവെങ്കിലും നിശ്ചലം എന്ന് പറയാവുന്ന ജന്മങ്ങളുടെ ഉടലിനെ തോല്പിക്കുമാര് സംസാരം തുടര്‍ന്ന് കൊണ്ടേയിരുന്നു.ഒരു നിമിഷം പോലും എനിക്ക് മുന്നിലുള്ളത് തല കൊണ്ട് മാത്രം തൊട്ടറിയാനും ചിന്തിചെടുക്കാനും കഴിയുന്ന ഒരു സഹ ജീവിയാണെന്നു എനിക്ക് തോന്നിയതേയില്ല.കുറെ സംസാരിച്ചു പുറത്തിറങ്ങിയപ്പോ ജീവിതത്തെ കുറിച്ച് എന്തൊക്കെയോ ഞാന്‍ അറിയാന്‍ തുടങ്ങിയിരുന്നു.കുറെ വായിച്ചും അറിഞ്ഞും കണ്ടും കേട്ടും കിട്ടാത്ത ഒരു വെളിച്ചം ആ സുഹൃത്ത്‌ എനിക്ക് നല്‍കിയിരുന്നു.

വീണ്ടുമൊരു ബോംബ്

2010-04-20T12:14:00.003+05:30

പത്രങ്ങള്‍ക്കും ചാനലുകള്‍ക്കും വീണ്ടും ആഘോഷ നിമിഷങ്ങള്‍.വിവാദങ്ങള്‍ കത്തി നില്‍ക്കുന്ന ഐ പീ എല്‍ മത്സരങ്ങള്‍ക്കിടയില്‍ ചിന്നസ്വാമി സ്റ്റേഡിയത്തില്‍ കളി കാണാന്‍ പോയ സുഹൃത്ത്‌ പുറത്തു ഒരു അമിട്ട് പൊട്ടുന്ന ശബ്ദം കേട്ടപ്പോള്‍ വിളിച്ചതാണെന്നെ.സംഭവമെന്തെന്നരിയാന്‍.ടി വി തുറന്നപ്പോള്‍ ജനരേറ്റര്‍ പോട്ടിതെരിച്ചതാനെന്ന ആദ്യ ന്യൂസ്‌ കേട്ടപ്പോ ഒരു സമാധാനം.പിന്നെ പയ്യെ വാര്‍ത്ത മാറി മറിയാന്‍ തുടങ്ങി.ബോംബ് പൊട്ടിയതാണത്രേ.ഓരോ ബോംബു പൊട്ടുമ്പോഴുമെന്ന പോലെ ഇത്തവണ ഏതു നസീറും നാസറും മുജാഹിദീനുമാണ് ഇതിനു പിന്നിലെന്ന സംശയവും ഉറപ്പും ഫ്ലാഷ് ന്യൂസുകളില്‍ ഒഴുകിക്കൊണ്ടേ ഇരിക്കുന്നു.ഇതൊന്നും ഒരു പുതുമയല്ലാത്തത് കൊണ്ട് ചാനലുകലോരോന്നായി മാറ്റി നോക്കി.എവിടെയങ്കിലും മറ്റെന്തെങ്കിലും പറയുന്നുണ്ടോ എന്ന്.ഒടുവില്‍ വാതുവെപ്പുകാര്‍ മുംബൈയുടെ സെമി ഫൈനല്‍ മാച്ച് ഹോം ഗ്രൗണ്ടില്‍ നടക്കാന്‍ വേണ്ടി ചെയ്തതാകാനും സാധ്യതയുണ്ടെന്ന നിരീക്ഷണം കര്‍ണ്ണാടക ആഭ്യന്തര മന്ത്രി പങ്കു വെച്ചപ്പോള്‍ ഇവിടെയെങ്കിലും ശരിയായ അന്വേഷണം നടക്കുമെന്ന ഒരു ചെറിയ ആശ്വാസം എനിക്കുമുണ്ട്.പക്ഷെ കേന്ദ്രസേന ഇന്ത്യന്‍ മുജാഹിദീനെ തന്നെ ഉറപ്പിച്ചു വെച്ചിരിക്കുകയാനെന്നാണ് കേള്‍ക്കുന്നതു.ചെയ്തത് ആരായാലും സത്യം പുറത്തു കൊണ്ട് വരണം.എന്നാല്‍ ആദ്യമേ രചിച്ച തിരക്കഥ ഇവിടെയും ആവര്‍ത്തിക്കുമോ എന്ന് നമുക്ക് കണ്ടറിയാം.

ഒരു വര്‍ഷം

2010-03-05T15:39:00.015+05:30

ബൂലോകത്ത് ഒരു വര്‍ഷം

ഭൂലോകത്ത് മറ്റൊരു വര്‍ഷം.

രണ്ടും ഒന്നിച്ചു വന്നത് തികച്ചും യാദൃശ്ചികമല്ലെങ്കിലുംമനപ്പൂര്‍വമായിരുന്നില്ല.ബ്ലോഗ്‌ എന്താണെന്ന് പോലും അറിഞ്ഞു കൂടായിരുന്നകാലത്ത് സുഹൃത്ത്‌ അരുണ്‍ ആണ് സംഭവത്തിന്റെ ഒരു ഐഡിയ തന്നത്.അന്നുംമലയാളത്തില്‍ ഈ സംഗതി ഉണ്ടെന്നു അറിഞ്ഞിരുന്നില്ല. പിന്നെ നാട്ടുകാരന്‍സുഹൃത്ത്‌ ശ്രദ്ധേയന്‍‍ ആണ് ഈ രംത്തെക്ക് എല്ലാ വിധ സഹായങ്ങളുമായി കൂടെകൂടിയത്.2009 മാര്‍ച്ച് 8-നു ആദ്യ പോസ്റ്റിട്ട ശേഷം പിന്നെയും കുറെ കഴിഞ്ഞാണ്ചിന്തയെ കുറിച്ചറിയുന്നത്.ചിന്തയില്‍ പോസ്റ്റുകളിട്ട ശേഷം കുറച്ചാളുകളെങ്കിലുംവായിക്കാനും അഭിപ്രായം പറയാനും തുടങ്ങി.ഏറെ കമന്റുകള്‍ പ്രതീക്ഷിച്ചപോസ്റ്റുകള്‍ക്ക്‌ തീരെ കമ്മന്റുകള്‍ ലഭിക്കാതെ വന്നപ്പോള്‍ ചിലപ്പോനിരാശപ്പെട്ടെന്കിലും എഴുതാന്‍ തോന്നിയപ്പോഴൊക്കെ വീണ്ടും വീണ്ടും എഴുതികൊണ്ടേയിരുന്നിട്ടുണ്ട്.കവിതയും പ്രതികരണങ്ങളുമായി ആനുകാലികവിഷയങ്ങളില്‍ പരമാവധി ഇടപെടാന്‍ ശ്രമിചിട്ടുന്ടെന്നാണ് കരുതുന്നത്.ഒട്ടുമിക്കപോസ്റ്റുകളും,അത് കഥയോ കവിതയോ പ്രതികരണമോ ലേഖനമോ എന്ത് തന്നെആയാലും ഓടിച്ചു നോക്കാനും പലതിലും അഭിപ്രായം പറയാനും ശ്രമിക്കാറുണ്ട്.

അഭിപ്രായങ്ങളും വിമര്‍ശനങ്ങളുമായി കൂടെ നടന്നു കൊണ്ടിരിക്കുന്നസുഹൃതുക്കള്‍ക്കെല്ലാം ഒരുപാട് നന്ദി.സംശയങ്ങള്‍ അപ്പപ്പോള്‍ തീര്‍ത്തു തന്നആദ്യാക്ഷരി' ബ്ലോഗ്‌,പോസ്റ്റുകള്‍ വായനക്കാരിലെതിച്ച 'ചിന്ത' അഗ്രിഗേറ്റര്‍-ഇവരെ പ്രത്യേകം സ്മരിക്കാതെ വയ്യ. '

ഇനിയും ഈ ചുരുള്‍ വഴി കടന്നു പോകണമന്ന അഭ്യര്‍ത്ഥനയോടെ.

പ്രേക്ഷകന്‍ ഞാന്‍-കാണുന്നുണ്ട്.

2010-02-26T00:01:00.003+05:30

ഒരു തുള്ളി ദ്രവം
തെറിച്ചു വീണതത്രെ.
പേറ്റുനോവാല്‍ മാതൃത്വവും
മുലത്തുമ്പാല്‍ ബാല്യവും
ഒട്ടിപ്പിടിച്ചതത്രെ.
നടന്നതും തടഞ്ഞു വീണതും
പിന്നെ നേടിയെടുത്തതും.
കൊക്കയില്‍ വീണ്‌
വാനോളം
ഒടുങ്ങിപ്പോയെന്ന്.
കുഴിബോംബു പൊട്ടി
പട്ടിണിക്കോലങ്ങള്‍
വിശപ്പറിയാ ലോകം
കാണാന്‍ പോയെന്ന്.
ഒരു പാതിരാവില്‍
ഒരു ചെറിയ ചലനം.
പിന്നെ കുറെ നിശ്ചലതകള്‍.
കണ്ടു കൊണ്ടിരിക്കയാണ്
ഞാന്‍-പ്രേക്ഷകന്‍.
തൊട്ടാല്‍ പൊള്ളിയ
തൊലിപ്പുറങ്ങള്‍,
തിരയായടിച്ച്
മണല്‍ത്തരികളില്‍
ആര്‍ത്തൊടുങ്ങിയതും-പിന്നെ
തളര്‍ന്നതും
ചുക്കിച്ചുളിഞ്ഞതും.
കാണുന്നു തല്‍സമയം -
എന്നും ഞാന്‍ പ്രേക്ഷകന്‍.

മിഴികള്‍ തുറന്ന്

തലമുറകള്‍

ഫ്ലാഷ് ന്യുസുകളില്‍

ചടഞ്ഞിരിപ്പുണ്ടെന്ന്.
ഓരോ ഞാനും
നിന്റെ മരണത്തില്‍
കണ്ണ് തുടയ്ക്കുന്നുന്ടെന്ന്.

മൈ നൈം ഈസ്‌ ഖാന്‍(i'm not a terrorist)

2010-02-16T22:59:00.005+05:30

(മുമ്പ് പബ്ലിഷ് ചെയ്തതാണ്..പുതിയ പേരില്‍ വീണ്ടും )

മതത്തെ അറിയാത്ത ചിലരുടെ ചെയ്തികളുടെ പേരില്‍ ഒരു സമൂഹം മുഴുവന്‍ വേട്ടയാടപ്പെടുമ്പോള്‍

(പ്രചോദനം - 'മുസ്ലിം' .....സച്ചിദാനന്ദന്‍ )

പിന്നെ അവര്‍ എന്നെ
തേടിയും വന്നു ...
പ്രതികരിക്കാന്‍ കഴിയാത്ത വിധം
എന്റെ ചൂണ്ടു വിരലും
അവര്‍ മുറിചെടുതിരുന്നു.
*******
എനിക്കുമുണ്ടായിരുന്നൊരു ബാല്യം.
ഉമ്മയുടെ മടിയില്‍ തല ചായ്ച്ചുറങ്ങിയ
പാഠ പുസ്തകങ്ങളിലെ കുട്ടിക്കാലം.
പഠിച്ചതെല്ലാം മനുഷ്യനെ കുറിച്ചായിരുന്നു.
നിറവാര്‍ന്ന മനുഷ്യ സ്നേഹത്തെ കുറിച്ച്.
********
ഇന്നിവിടെ ഈ അഴികളില്‍
ഞാനൊരു ഭീകര വാദിയാണ്.
ഹൃദയത്തിലുരുവിടും ബാങ്കുകള്‍
അയല്‍കാരനെ വെട്ടി നുറുക്കും
മന്ത്രങ്ങളായി മാറ്റുന്നവന്‍ .
ചിന്തകളെ നയിക്കും സൂക്തങ്ങള്‍
സുഹൃത്തിന്‍ കഴുത്തില്‍
കടാരയായ്‌ ആഴ്ത്തുന്നവന്‍ .
നീട്ടിവളര്‍ത്തും താടിയിലും
അറബിപ്പെരിലും
നെറ്റിയില്‍ മിന്നും നിസ്കാരതഴംബിലും
സമൂഹമലക്കപ്പെടും കാലം.
മാപ്പിളപ്പാട്ടിലും ഗസലിലും
ഒപ്പന തന്‍ ചുവടിലും
കത്തിയും ബോംബും
നിറയും നേരം.
നെഞ്ചില്‍ തിളയ്ക്കുന്നത്‌
നുരയായ്‌ പതയ്ക്കും
രക്തമല്ല .
ഒരിറ്റു കണ്ണുനീരാണ്-
അയല്‍കാരന്റെ ഒട്ടിയ വയറില്‍
സുഖിക്കുന്നവന്‍
നിഷേധിയെന്നോതിയ
തത്വങ്ങള്‍
മഴയായ്‌ പതിക്കുകയാനിവിടെ.
ഇനിയും തളരാതെ
നില്‍ക്കുമീ വഴികളില്‍
വഴികാട്ടിയായീ
ഗ്രന്ഥമുള്ളത്രയും.

കേളപ്പേട്ടന്റെ നെടുവീര്‍പ്പുകള്‍

2010-02-03T23:41:00.001+05:30

ആദ്യ നെടുവീര്‍പ്പ്
അന്നാണ് കേളപ്പേട്ടന്‍ ആദ്യമായി നെടുവീര്‍പ്പിട്ടത്.അമ്മദാജി മുണ്ടും പൊക്കി ഓടുന്നത് പറമ്പത്തെ തെങ്ങിന്‍ മുകളിലിരുന്നു കേളപെട്ടന്‍ കണ്ടു.അങ്ങനെയൊന്നും അമ്മദാജി ഓടാറില്ല.കൊണ്ടോട്ടീന്നു കെട്ടിക്കൊണ്ടു വന്ന പാതുമ്മതാത്ത ആദ്യ പേറ്റുനോവാല്‍ പുളയുംബോഴും അമ്മദാജി ഓടിയിരുന്നില്ല .

"അല്ലാന്ന്,ങ്ങളെട്തെക്കാ പായ്ന്നെ...ബല്ലാതൊരു പാച്ചില്‍....അങ്ങാടിലെന്ത്നാ പോത്ത്‌ പെറ്റ്ക്ക്ണ്ടാ...?" തെങ്ങിന്‍ മുകളിലിരുന്ന് കേളപ്പെട്ടന്‍ വിളിച്ചു ചോദിച്ചു.

"സ്കൂള്‍ പറമ്പില് എന്തോര് ജീവി ബന്ന്ക്ക്ണ്ട്...ഇഞ്ഞ് ബേം കീഞ്ഞിക്ക് പോരി.."
മൂത്ത് നിന്ന കരിക്ക് ഒറ്റ വലിക്കു താഴേക്കിട്ടു കേളപെട്ടന്‍ ഓടി-സ്കൂള്‍ പറമ്പിലേക്ക്. നാട്ടുകാര് മൊത്തമുന്ടായിരുന്നവിടെ. എവിടെയെത്തിയാലും കേളപ്പെട്ടനൊരു സ്വഭാവമുണ്ട്.തെങ്ങിന്റെ തലപ്പതെക്കാണ്നോട്ടം.
തെങ്ങില്‍ തലപ്പില്‍ പല്ല് വെച്ചുരക്കുന്ന ജീവിയെ കണ്ടപ്പോ കൂട്ടത്തിലാരോ വിളിച്ചു പറയാന്‍ തുടങ്ങി. "അമ്മാമന്‍ ബന്ടീന്റെ എളിയയായിട്ട് ബരുമിത്..."

"ജെ സി ബി യെന്നും പറയാം "നാട്ടിലല്പം ലോക വിവരമുള്ള കരീം മാഷ്‌ തന്റെ എന്സൈക്ലോപീഡിയ തുറക്കാന്‍ തുടങ്ങി.

ആരെയും ഇത് വരെ വില വെക്കാതിരുന്ന കേളപ്പെട്ടന് അന്നാദ്യമായി ബഹുമാന ഭാരത്താല്‍ തന്റെ തല താഴുന്നത് പോലെ തോന്നി.ഒറ്റയടിക്ക് തെങ്ങിന്‍ തലപ്പില്‍ കയറിപ്പറ്റുന്ന ആ ജീവിയെ മനസ്സില്‍ ധ്യാനിച്ച്‌ കേളപ്പെട്ടന്‍ ജീവിതത്തിലാദ്യമായി നെടുവീര്‍പ്പിട്ടു.

അവസാന നെടുവീര്‍പ്പ്

തഴമ്പ് കയറി കട്ട പിടിച്ച കാല്‍ തഴുകി കേളപ്പട്ടന്‍ പിറുപിറുത്തു.. കൊരണക്കുന്നിന്റെ മുകളിലെ ചെറ്റക്കുടിലിലിരുന്നു കേളപ്പേട്ടന്‍ പിരുപിരുക്കുന്നത് താഴെ കണാരേട്ടന്റെ കുമിട്ടിയിലിരുന്നു ചായ നുണയുന്നവര്‍ക്ക് വ്യക്തമായി കേള്‍ക്കാം. പണ്ട് നാട്ടു വര്‍ത്തമാനങ്ങളും രാഷ്ട്രീയവും ഇടക്കൊരോ തല്ലുമോക്കെയായി സജീവമായിരുന്നത്രേ കണാരേട്ടന്റെ ചായക്കട.ഞങ്ങളുടെ സ്കൂളിലേക്കുള്ള വഴിയിലായതിനാല്‍ ഇടയ്ക്കു ഞങ്ങളും കൂടും,ഒന്നുമറിയില്ലെങ്കിലും.കണാരേട്ടന്‍ ചായ പാരുന്നത് കാണാന്‍ നല്ല രസമായിരുന്നു. ആദ്യം വന്ന ആളുകളുടെ എണ്ണമെടുക്കും. പിന്നെ അത്രയും എണ്ണത്തിന് ഒന്ന് കൂടുതല്‍ എന്ന കണക്കില്‍ ഗ്ലാസ് നിരത്തി വെക്കും മണ്ണ് കെട്ടിയുണ്ടാക്കിയ തിണ്ണയില്‍.ആ ഒരു ഗ്ലാസ് കണാരേട്ടനാണ്.പിന്നെ ഒന്നിച്ചു ഗ്ലാസ്സുകളില്‍ വെള്ളമൊഴിച്ച് പത്തു വിരലുകളിലായി പത്തു ഗ്ലാസുകള്‍ പിടിച്ചു ഒന്നിച്ചു കഴുകിയെടുക്കും. കടുപ്പത്തിലുള്ള ചായ ഇടവേളകളില്ലാതെ നിരത്തി വെച്ച ഗ്ലാസ്സുകളിലേക്ക് പാര്‍ന്നെടുക്കും. ഗ്രാമത്തിന്റെ തിരുശേഷിപ്പുകളില്‍ ഒന്നാണ് കണാരേട്ടന്റെ ഈ ചായക്കൂര.പണ്ട് സ്കൂളിലേക്ക് പോയ വഴി നടന്നു ഇപ്പോഴും ചായ കുടിക്കും ഞാന്‍ കണാരേട്ടന്റെ കടയില്‍ നിന്നും.പിന്നെ കൊരണ ക്കുന്നിലേക്ക് നടന്നു കയറും.അതിന്റെ മുകളിലെ പാറയിലിരുന്നാല്‍ ഞങ്ങളുടെ ഗ്രാമമോന്നാകെ കാണാം.പാറക്കു ചേര്‍ന്നാണ് കേളപ്പെട്ടന്റെ വീട്. കുറെ നേരം പാറയിലിരുന്നു കേളപ്പെട്ടന്റെ കുടിലിലൊന്ന്കയറും. കാണുമ്പോള്‍ കേള പ്പെട്ടന്‍ തുടങ്ങും തന്റെ പിറുപിറുക്കലുകള്‍ .

"ഇങ്ങക്കൊക്കെ ഇപ്പം പൈശ മാത്തിരം മതീലെ..?.അപ്പറത്ത് കണ്ടില്ലേ ഇഞ്ഞ് ഓന്‍ണ്ടാക്കി ബെച്ച ബംഗ്ലാവ്..?ന്റെ ത്ര തെങ്ങാ ഓന്‍ മുറിച്ചേ....?'

"അല്ല കേളപ്പേട്ടാ ഇങ്ങളെന്തിനാ ഇത്രേം എടങ്ങേരായിട്ടു ഇബടെ കെടക്ക്ന്നെ...?ഇങ്ങക്കാടെ പോയി കേടന്നൂദേന്ന്..?"

പിന്നെ ഒന്നും മിണ്ടില്ല കേളപ്പേട്ടന്‍. ഞങ്ങളുടെ നാട്ടിലെ അംഗ്രീകൃത തെങ്ങ് കയറ്റക്കാരനായിരുന്നു കേളപ്പേട്ടന്‍.തെങ്ങുകളുടെ ഇണക്കവും പിണക്കവുമറിയുന്ന പണിക്കാരന്‍.കേളപ്പന്‍ കയറ്റം നിര്‍ത്തിയതില്‍ പിന്നെ തേങ്ങ നന്നായി കുറഞ്ഞെന്നു ഉമ്മ ഇപ്പോഴും പറയും. കൊരണക്കുന്നു കയറി പണ്ട് കുറെ പോയിട്ടുണ്ട് കേളപ്പീട്ടനെ തിരക്കി. അഞ്ചു പ്രാവശ്യം കുന്നു കയറിയാല്‍ തൊട്ടടുത്ത ദിവസം കേളപ്പേട്ടന്‍ തേങ്ങ താഴെയിടുന്ന ശബ്ദം കേട്ടാണ് ഞങ്ങളുനരാറു.പിന്നെ തേങ്ങ പെറുക്കിയിടല്‍ ഞങ്ങടെ പണിയാണ്.തെങ്ങുകേറ്റം കഴിഞ്ഞു കേളപ്പെട്ടന്‍ മുറ്റത്ത്‌വന്നിരുന്ന്തേങ്ങ എണ്ണാന്‍ തുടങ്ങും. "ഒന്ന്,രണ്ടു,മൂന്ന്,...."

കേളപ്പേട്ടന്‍ എണ്ണുമ്പോള്‍ സ്കൂളില്‍ സലാം മാഷ്‌ എണ്ണം പഠിപ്പിക്കുന്നതാണെനിക്കോര്‍മ്മ വരിക. എണ്ണിക്കഴിയുമ്പോ ഉച്ചത്തില്‍ കേളപ്പെട്ടന്‍ വിളിച്ചു പറയാന്‍ തുടങ്ങും.

"അല്ലുമ്മാ,ഞമ്മളെ എണ്ണം കയ്ഞ്ഞ്...പക്കെന്ഗില്‍തേങ്ങ കൊറേ ബാക്കിണ്ട്ന്നു ..."

എണ്ണിപ്പടിപ്പിച്ച പിന്‍തലമുറ നൂറിനപ്പുരത്തുള്ള ലോകം കേളപ്പെട്ടനെ പഠിപ്പിചിരുന്നില്ല . എണ്ണിയതിനുള്ള തേങ്ങയും കണക്കാക്കി അതുമെടുത്ത് കേളപ്പേട്ടന്‍ സ്ഥലം വിടും-ആരെയും വകവെക്കാതെ .

അങ്ങാടിയില്‍ കെട്ടിയുണ്ടാകിയ താല്ക്കാലിക സ്റ്റേജില് സഖാവ് നാണുവേട്ടന്‍ ഖോരഖോരം പ്രസംഗം തുടര്‍ന്ന് കൊണ്ടിരുന്നു. "നമ്മുടെ നാട്ടില്‍ സാമ്രാജ്യത്വ അധിനിവേശ ബൂര്‍ഷ്വാ ശകതികളുടെ കടന്നുകയറ്റം സൃഷ്ടിക്കുന്ന വിപത്തുകള്‍ക്കെതിരെ...." നാണുവേട്ടന്‍ പ്രസംഗം തുടര്‍ന്ന് കൊണ്ടിരിക്കുമ്പോള്‍ കുറെ കുട്ടിസഖാക്കളുടെ അകമ്പടിയോടെ പണ്ട് സ്കൂള്‍ മുറ്റം നിരത്തിയ അപൂര്‍വ ജീവി കൊരണക്കുന്നു കയറുകയായിരുന്നു. മഴതുള്ളികളോട് കലഹിക്കാന്‍ നില്‍കാതെ വെയിലില്‍ തളിര്ക്കാനൊരുങ്ങാതെ പുല്‍നാമ്പുകളോരോന്നും ജെ സീ ബീ യുടെ അട്ടഹാസങ്ങള്‍ക്ക്‌ കാതോര്‍ത്തു തളര്‍ന്നു വീഴുകയായിരുന്നു.പണ്ട് സ്കൂള്‍ പറമ്പില്‍ തടിച്ചു കൂടിയ അതെ ജനക്കൂട്ടം പുതിയ തലമുറയായി കീഴടങ്ങലിന്റെ സ്വരം ആവര്‍ത്തിച്ചു കൊണ്ടിരുന്നു.

കേളപ്പേട്ടന്‍ അപ്പോഴും സ്വന്തം കൂരയിലായിരുന്നു. വികസനത്തിന്റെ സാന്ത്വനങ്ങള്‍ ഇപ്പോള്‍ കേളപ്പേട്ടന്റെ കൂരയെ തൊട്ടു തലോടാന്‍ തുടങ്ങിയിരിക്കുന്നു. പണ്ട് തെങ്ങിന്‍ തലപ്പില്‍ പാഞ്ഞു കയറിയ അതെ ജീവി ഇപ്പൊ തന്റെ തലയ്ക്കു മുകളില്‍ കയറിയിരി ക്കുമ്പോഴും കേളപ്പേട്ടന്‍ ഒന്നും മിണ്ടിയില്ല. ആരെയും കൂസാത്ത കേളപ്പേട്ടന്‍ അതേ ബഹുമാന ഭാരത്തോടെ വീണ്ടും നെടുവീര്‍പ്പിട്ടു.

എല്ലാ പുകളും ഇരൈവനുക്കെ

2010-02-01T13:13:00.002+05:30

ഗോള്‍ഡെന്‍ ഗ്ലോബ്,ഓസ്കാര്‍,പത്മ ഭൂഷണ്‍ - ഒടുവില്‍ സംഗീത ലോകത്തെ അത്യുന്നത പുരസ്കാരം-ഗ്രാമി.ഒരു പ്രതിഭയ്ക്ക് കിട്ടാവുന്ന എല്ലാ പുരസ്കാരങ്ങളും നേടി ഓരോ ഭാരതീയന്റെയും അഭിമാനമായി മാറിയ ഏ ആര്‍ റഹ്മാന് ഹൃദയത്തില്‍ തൊട്ട ഭാവുകങ്ങള്‍.

ചില കലോല്‍സവക്കാഴ്ചകള്‍

2010-01-20T19:12:00.005+05:30

കലയെ നെഞ്ചകത്ത് കൊണ്ട് നടക്കുന്ന കോഴിക്കോടിന്റെ മണ്ണില്‍ സുവര്‍ണ്ണ ജൂബിലി കലോത്സവത്തിന് തിരശീല വീണു.ഒരുപാട് പ്രത്യേകതകള്‍ അനുഭവപ്പെട്ടു ഈ കലോത്സവത്തിന് .
· മാനാഞ്ചിരയിലും ടൌണ്‍ ഹാളിലും ക്രിസ്തിയന്‍ കോളേജിലും നടക്കുന്നത് എന്ത് തന്നെ ബോറന്‍ പരിപാടിയായാലും വെയിലും പൊടിയും വക വെക്കാതെ ഇരചെത്തിയ ആള്‍ക്കൂട്ടം കോഴിക്കാടല്ലാതെ മറ്റെവിടെയും കാനാന്‍ കഴിയില്ലെന്ന് തോന്നുന്നു.ആരൊക്കെയോ പറയുന്നത് കേള്‍ക്കുമ്പോള്‍ സ്റ്റേജില് നടക്കുന്നത് ഒപ്പനയാനെന്നും മാര്‍ഗം കളിയാണെന്നും മോഹിനിയാട്ടമാനെന്നും മനസ്സിലാക്കുകയല്ലാതെ പിന്നില്‍ ഏന്തി വലിഞ്ഞു കാണുന്ന ഞങ്ങള്‍ക്ക് മറ്റു നിവൃത്തിയില്ലായിരുന്നു.
· ഒന്നാം സ്ഥാനം കിട്ടിയ ടീം എത്ര തവണ ആവര്‍ത്തിക്കണം തങ്ങളുടെ കളികള്‍.ഉത്തരം ലളിതം.എത്ര ചാനലുകലുണ്ടോ അത്രയും.റിസള്‍ട്ട് വരുമ്പോ ടീമുകളെ തേടിയുള്ള ചാനലുകാരുടെ ഓട്ടം ഒന്ന് കാണേണ്ടത് തന്നെ.
· പിന്നെയുമുണ്ട്‌ ചാനല്‍ വിശേഷങ്ങള്‍.കോഴിക്കോട് ടീം സ്വര്‍ണ്ണ കപ്പും വാങ്ങി താഴെയിറങ്ങാന്‍ കാത്തു നിന്നില്ല,തുടങ്ങീ ചാനല്‍ യുദ്ധം.ഒടുവില്‍ കപ്പു രണ്ടു കഷണമായത്രേ.
· കളിക്കുന്നതെന്തന്നരിയാതെയുള്ള കളികളും അത്യുന്നതമായ കല തന്നെയോ..?ഭരതനാട്യവും മോഹിനിയാട്ടവും കഴിഞ്ഞിറങ്ങിയ പല കുട്ടികള്‍ക്കും തങ്ങള്‍ കളിച്ചതെന്തെന്നരിയില്ലത്രേ.ഗുരു പാടിതന്നത് വള്ളി പുള്ളി തെറ്റാതെ ആടിതകര്‍ത്തു.എ ഗ്രേഡു കിട്ടാന്‍ ഇത് തന്നെ ധാരാളം.ഇവരോ ഭാവിയിലെ നര്‍ത്തകിമാര്‍..?
· ചാനലുകളുടെ അതിപ്രസരം രചനാ വിഭാഗത്തിന്റെ അവഗണനയ്ക്ക് കാരണമായി എന്ന് പറഞ്ഞാല്‍ തെറ്റല്ല.ചാനലുകാര്‍ തിരിഞ്ഞു നോക്കാതവര്‍ക്ക് തങ്ങളെങ്ങനെ തണല്‍ നല്‍കുമെന്ന ചിന്തയിലായെന്നു തോന്നുന്നു പത്ര മാധ്യമങ്ങള്‍.പണ്ട് പലപ്പോഴും കഥയും കവിതയും പത്രങ്ങളില്‍ ചരച്ചയായി വന്നിരുന്നുവെങ്കില്‍ ഇത്തവണ ചാനല്‍ പ്രളയത്തില്‍ എഴുത്തുകാരും ചിത്രകാരന്മാരും ഒലിച്ചു പോയി . പ്രതിഭ വളരാന്‍ മാധ്യമങ്ങളില്ലാതെ പറ്റുമോ ഇക്കാലത്ത്..?
· നാടകം നിരാശപ്പെടുത്തി ഇത്തവണ . കഥയിലും അവതരണത്തിലും പുതുമ പുലര്‍ത്തിയ നാടകങ്ങള്‍ തുലോം കുറവായിരുന്നു. നിലവാര തകര്‍ച്ച നേരിട്ട മറ്റൊരിനം മിമിക്രിയായിരുന്നു.പൂച്ചയും നായയും നടന്മാരും അമ്പലത്തിലെ ഉറുക്കും നികേഷ് കുമാറും തന്നെയായിരുന്നു നിറഞ്ഞു നിന്നത്.
· ഉത്ഖാടന സമ്മേളനത്തില്‍ എം പി ക്കൊരാഗ്രഹം.ഒന്ന് പാടി നോക്കിയാലോ എന്ന്.ആരും തടഞ്ഞില്ല .മാത്രമല്ല ആരോ പുറത്തു തട്ടി അഭിനന്ദിക്കുകയും ചെയ്തെന്നു തോന്നുന്നു . അതിനാലാകാം ഗാന ഗന്ധര്‍വന്റെ സാന്നിധ്യത്തില്‍ സമാപന ദിവസവും രാഘവന്‍ സാര്‍ തന്റെ കള കൂജനം പുറത്തെടുത്തത്."ഓര്‍മ്മകളെ .കൈവള ചാര്‍ത്തി..."..പാടി തുടങ്ങിയപ്പോ വോട്ടു ചെയ്തു ജയിപ്പിച്ച നാട്ടുകാര്‍ ഒരു കൂവലിന്റെ വക്കിലെതിയപ്പോ രക്ഷിക്കാന്‍ സാക്ഷാല്‍ ഗാന ഗന്ധര്‍വന്റെ ശബ്ദം തന്നെ വേണ്ടി വന്നു. ഒടുവില്‍ കൈതപ്രവും കൂടെ വന്നു പാടാന്‍ തുടങ്ങിയപ്പോ കണ്ടു നിന്നവര്‍ക്ക് അതൊരു അപൂര്‍വ കാഴ്ചയായി.
· കുട്ടിപ്പോലീസുകാരായിരുന്നു മേളയുടെ മറ്റൊരാകര്‍ഷണം. കേരളപോലീസുകാരെ കടത്തി വെട്ടുന്ന ക്രമസമാധാന പാലകരായി കുട്ടിപ്പോലീസ് വിലസിയപ്പോള്‍ കേരള പോലീസിലൊരു പുതിയ വിഭാഗം തുടങ്ങാനുള്ള സാധ്യത അസ്ഥാനത്തല്ലെന്ന് തോന്നിപ്പോയി.
· പച്ചക്കറിക്കും അരിക്കുമെല്ലാം വില കുതിച്ചു കയറിയതിനാലാവാം ഭക്ഷണപ്പുരയില്‍ വിഭവങ്ങള്‍ അത്രയങ്ങ് ഗംഭീരമായില്ലത്രേ. അടുത്തുള്ള പാരാഗണി ല് ഭക്ഷനപ്പുരയെക്കാള്‍ ചിലപ്പോ തിരക്കുമനുഭവപ്പെട്ടു.കോഴിക്കോട് വരെ വന്നു കോഴിക്കോടന്‍ ബിരിയാണിയും കഴിക്കാതെ പോകുകയോ...?
· കേരളത്തിന്റെ സാംസ്കാരിക പയ്തൃകംവിളിച്ചോതുന്ന പല കലകളും ഇന്ന് കാണുന്നത് കലോത്സവ വേദികളില്‍ മാത്രമാണ് . മാര്‍ഗം കളിയും പരിച മുട്ടും ദഫ് മുട്ടും അറബന മുട്ടും കൊല്‍ക്കളിയും ഒപ്പനയും പൂരക്കളിയും തിരുവാതിരയും നമ്മുടെ നാട്ടിന്‍ പുറങ്ങളില്‍ പണ്ട് പതിവ് കാഴ്ച്ചയായിരുന്നെങ്കില്‍ ഇന്ന് കലോത്സവ വേദികളില്‍ മാത്രമുള്ള ഒരു അപൂര്‍വ കാഴ്ചയായി ഈ കലകള്‍ മാറിയിരിക്കുന്നു

പുഴ ഒഴുകിയ നിമിഷങ്ങള്‍...2001 ജനുവരി 12

2010-01-13T11:50:00.006+05:30

മറവി ഒരു അനുഗ്രഹമാണെന്ന് ചിലപ്പോള്‍ മാത്രം തോന്നാറുണ്ട്.കാരണം ജീവിതത്തില്‍ മറക്കാന്‍ തോന്നിയ അനുഭവങ്ങള്‍ വളരെ കുറവാണ് .അങ്ങനെയൊരു ദിവസമായിരുന്നു 2001 ജനുവരി 12.
കവിതകള്‍ മത്സരങ്ങള്‍ക്ക് വേണ്ടി മാത്രമേ എഴുതിയിരുന്നുള്ളൂ . അഞ്ചില്‍ പഠിക്കുമ്പോ യുവജനോല്സവതിലാണ് ആദ്യമായി പ്രഭാത കിരണങ്ങള്‍ ചില വരികളായ് കുറിച്ചതും അതിലടങ്ങിയ കവിത സലാം മാഷ്‌ എങ്ങനെയൊക്കെയോ കണ്ടെത്തിയതും.പിന്നെ എല്ലാ യുവജനോത്സവങ്ങളിലും പ്രതീക്ഷയുടെ അമിത ഭാരവുമായി മത്സരിച്ചു.പത്തില്‍ പഠിക്കുമ്പോ പടച്ചോന്റെ അനുഗ്രഹം ഒന്ന് കൊണ്ട് മാത്രം തൊടുപുഴയിലെ സംസ്ഥാന യുവജനോല്സവതിലേക്ക് പങ്കെടുക്കാന്‍ വേണ്ടി വണ്ടി കയറി.കുറെ പ്രതിഭാധനന്മാരുടെ കൂടെയുള്ള അന്നത്തെ അന്തിയുരക്കമൊക്കെ ഓര്‍മയില്‍ തങ്ങി നില്‍ക്കുന്നുണ്ട്.പിറ്റേന്ന് രാവിലെ ഉണര്‍ന്നു തൊടുപുഴയിലെ മഹാറാണി പബ്ലിക്ക് സ്കൂളിലെ ക്ലാസ് മുറിയില്‍ ചെന്നിരുന്നപ്പോള്‍ ഒരു കവിതയെഴുതാനുള്ള അന്തരീക്ഷമായിരുന്നില്ല.പുറത്തു ബാന്റ് മേള മത്സരം കൊഴു കൊഴുക്കുന്നു. മുമ്പ് ഏതൊക്കെയോ മത്സരങ്ങളില്‍ കേട്ട് പതിഞ്ഞ "പുഴ പറയുന്നത് " എന്ന വിഷയം വന്നപ്പോള്‍ മനസ്സില്‍ തോന്നിയ ചില വരികള്‍ കുത്തിക്കുറിച്ചു.കവിതയെഴുതി പുറത്തിറങ്ങി ചില മത്സര വേദികളിലൂടെ ചുറ്റിക്കരങ്ങുമ്പോഴാണ് മൈക്കിലൂടെ ഒന്നാം സ്ഥാനം കിട്ടിയെന്ന വാര്‍ത്ത അറിഞ്ഞത്.വാര്‍ത്ത കേട്ടപ്പോ എന്താണ് ചെയ്യേണ്ടതെന്നറിയാത്ത അവസ്ഥയായി.മീഡിയ റൂമിലേക്കുള്ള വിളിയായിരുന്നു കാതുകളില്‍ . പക്ഷെ വീട്ടിലേക്കു വിളിച്ചു പറയാനാണ് അപ്പൊ തോന്നിയത്.ഫോണെടുത്തത് താത്തയായിരുന്നു.താതാന്റെ ശബ്ദം ഇടറിയ പോലെ തോന്നി.കുറച്ചു കഴിഞ്ഞപ്പോ തന്നെ കൂട്ടിക്കൊണ്ടു പോകാന്‍ അളിയന്‍ തോടുപുഴയിലേക്ക് വരുന്നുവെന്നറിഞ്ഞപ്പോള്‍ പെട്ടെന്നെന്തേ ഇങ്ങനെ എന്ന് തോന്നി.അളിയന്‍ വന്ന ഉടനെ വീട്ടിലേക്കുള്ള മടക്ക യാത്ര ആരംഭിച്ചു.മിമിക്രി മത്സരവും നാടകവും കാണാനുള്ള ആഗ്രഹം നടക്കാത്ത നിരാശയില്‍ ഞങ്ങള്‍ മടങ്ങി.ബസ്സ്‌ യാത്രയില്‍ ഉച്ചത്തില്‍ മുഴങ്ങിക്കൊണ്ടിരുന്ന പാട്ടിന്റെ ശബ്ദം കുറക്കാന്‍ അളിയന്‍ ആവശ്യപ്പെട്ടപ്പോഴും എനിക്ക് ഒരു അപരിചിതത്വം അനുഭവപ്പെട്ടില്ല.ബസ്‌ ഇറങ്ങി വീട്ടിലേക്കു നടക്കുമ്പോഴാണ് അളിയന്‍ ആ വിവരം പറഞ്ഞത്.ഗള്‍ഫിലുള്ള എളാപ്പ ആക്സിഡന്റില്‍ മരണപ്പെട്ട വിവരം. എന്റെ മനസ്സില്‍ പുഴയെ കുറിച്ചുള്ള ചിന്തകള്‍ വരികളായ് ഒഴുകുന്ന അതെ നിമിഷമാണ് ഞങ്ങളുടെ എളാപ്പ മരണത്തിലേക്ക് ഒഴുകിയിരങ്ങിയത്. എന്നെയായിരുന്നത്രേ എളാ പ്പാക്ക് ഏറെ ഇഷ്ടം ചെറുപ്പത്തില്‍.എളാപ്പാന്റെ ഒരേയൊരു മകന്‍ ഫാഹിമ്ക ഞങ്ങളുടെ വീട്ടില്‍ തന്നെയായിരുന്നു കൂടുതലും. ഫാഹിമ്ക എന്നെ കെട്ടിപ്പിടിച്ചു കണ്ണീരില്‍ കലര്‍ന്ന പുഞ്ചിരിയാല്‍ അഭിനന്ദിക്കുമ്പോള്‍ ഉള്ളിലൊരു മരവിപ്പായിരുന്നു.ഒന്നാം സ്ഥാനത്തിനു കിട്ടിയ ട്രോഫിയും രൂപയും ചുരുട്ടിപിടിച്ച കൈകള്‍ വിറക്കുകയായിരുന്നു.
ചില നിമിഷങ്ങളില്‍ പുഴ കുളിരായ് ഒഴുകും.ചിലപ്പോ രൌദ്ര ഭാവം-മറക്കാന്‍ കൊതിക്കുന്ന നിമിഷം.പുഴ ഒഴുകുന്നതിനിടയിലെവിടെയോ രണ്ടു ഭാവങ്ങളും ഒരുമിച്ചു കണ്ട നിമിഷങ്ങളായിരുന്നു അവ.ഓര്‍ക്കണമെന്നോ മറക്കനമെന്നോ തോന്നാത്ത ഒരനുഭവം.

നേര്‍ക്കാഴ്ച്ചകള്‍

2010-01-05T18:53:00.005+05:30

പുറംകാഴ്ചകള്‍
പുതപ്പായ് മൂടുന്നുണ്ട്‌
ഡിസംബര്‍.
ഉള്ളെരിയുമ്പോ
പതിയെ തുറക്കും
ജനല്‍പ്പാളികള്‍.
വെയില്‍ പൊട്ടുകള്‍ തൊടുമ്പോള്‍
അറിയാറുണ്ട് പുറംകാഴ്ചകള്‍.

ഉന്മാദം

വെട്ടി വീഴ്ത്തുന്ന
ദേശീയതയുടെ
കയ്യും കാലും.
കുമ്പിട്ടു നക്കാന്‍
കരാറുകള്‍ , രാഷ്ട്രീയക്കളരികള്‍.
പട്ടിണി പ്പാവതിന്റെ
നെഞ്ചിന് ചൂടളക്കാത്ത

താപമാപിനികള്‍,
ഉച്ചകോടികള്‍ .

അകക്കാഴ്ചകള്‍
കാഴ്ച കണ്ടൊടുവില്‍
ഡിസംബര്‍ പുതപ്പാല്‍ തൊടുമ്പോള്‍
ചുരുങ്ങി ക്കൂടുന്നത്
നിന്നെ പ്രണയിചിട്ടല്ല .
പുറത്തിറങ്ങാന്‍ പേടിയാണിപ്പോ.
പുര നിറഞ്ഞു
രണ്ടെണ്ണം നില്‍ക്കുന്നതും
സ്വര്‍ണ്ണം പതിമൂന്നു കടന്നതും.
തേങ്ങ കിടന്നു നരയ്ക്കുന്നുണ്ട്
പറമ്പിന്‍ മൂലയില്‍.
പെറുക്കിയെടുത്ത് വറ്റു മണികള്‍
വിറക്കും കയ്യാല്‍
കടിച്ചിരക്കാറുണ്ട്.

കണക്കെടുപ്പിനൊടുവില്‍
ശൂന്യമാം
താളില്‍ കോറിയിടുന്നുണ്ട് ,
ചില അക്ഷരങ്ങള്‍
കൂടെ.

പ്രണയപ്പോരാട്ടം

2009-11-28T23:47:00.006+05:30

മുടിനാരിഴയഴിച്ചാ
മൃദുല മേനിയില്‍
എണ്ണിപ്പടര്‍ന്നതും
പിന്നെ ഞാനും നീയും
ചിരിക്കുന്ന ഗാന്ധിത്തലയും
തലയിണച്ചുവട്ടില്‍
പ്രേമിച്ചമര്‍ന്നതും.
അട്ടിയായമരുന്ന
ആയിരക്കെട്ടുകള്‍
കെട്ടിപ്പൂട്ടാന്‍
മാതൃത്വത്തിന്‍
വിരല്‍ക്കൊടികളരിഞ്ഞപ്പൊഴും ,
മൂടി വെക്കാന്‍
സഹോദരിയുടെ
മാനം കവര്‍ന്നപ്പൊഴും ,
താങ്ങി നിര്‍ത്താന്‍
പാതിജീവന്റെ
നട്ടെല്ലൊടിചപ്പൊഴും
ചോദിചില്ലാരും
എന്റെ ജാതിയും
നിന്റെ വര്‍ണ്ണവും .
പിന്നെ
മനുജ രക്തം
പടര്‍ന്നു
ഞാന്‍ നിന്നെ പ്രണയിച്ചു
തുടങ്ങിയപ്പോള്‍
പ്രണയപ്പോരാട്ടം
കത്തിപ്പടരാന്‍
തുടങ്ങിയിരുന്നു.

ഒബാമ:ചിരിക്കാനും പഠിപ്പിക്കുന്നു

2009-10-09T18:25:00.001+05:30

ഒന്നും പറയാനില്ല..
"ഒബാമയ്ക്ക് സമാധാന നോബല്‍ സമ്മാനം"
തുടങ്ങിക്കോ ചിരി-കൂട്ടച്ചിരി...
ഹ ഹ ഹ ഹ ഹ....
ഈ സമാധാനത്തിന്റെ അര്ത്ഥം..?
മാറ്റത്തിനുള്ള സ്വപ്‌നങ്ങള്‍ വിളിച്ചു പറയലോ അതോ,
പഞ്ചാര വര്ത്തമാനം പറഞ്ഞു ആളെ വീഴ്തലോ...?
എന്തായാലും കുറെ കാലത്തേക്ക് ചിരിക്കാന്‍ കായംകുളം എക്സ്പ്രസ്സും വാഴക്കൊടനെയും അരീക്കൊടനെയും നോക്കിപ്പോകേണ്ടതില്ല .

വെറുതെ ഈ ജീവിതം

2009-10-01T14:30:00.001+05:30

ഉറുമ്പുകള്‍ വട്ടം കൂടുന്നുണ്ട് .
കാലങ്ങളുടെ കരുതിവെപ്പുകളിലൂടെ
അവ പതിയെ അരിച്ചിരങ്ങുന്നുണ്ട്.
അലക്കിതകര്‍ത്ത
നാക്ക് ഞെരിഞ്ഞമരുന്നുണ്ട് .
ഉലകം അടക്കിപ്പിടിച്ചിരുന്ന കൈകള്‍ക്കുള്ളില്‍
ഒരുപാടിടങ്ങളാല്‍
കൂടുന്നുണ്ട് കാറ്റ്.
കടങ്ങള്‍ വട്ടമിടുന്നുണ്ട്
കുറ്റപത്രങ്ങള്‍ പാറിപ്പറക്കുന്നുണ്ട്.
കറുപ്പിച്ച മുടിയും
വെളുപ്പിച്ച പല്ലുകളും
കൊതിപ്പിച്ച കണ്ണുകളും
പുതപ്പിച്ച ഉടലും
കരിഞ്ഞമരുന്നുണ്ട്-
അരികില്‍ ചില കോലങ്ങള്‍
കാത്തിരിപ്പുണ്ട്‌-
കയറുകളുടെ വട്ടം
കഴുത്തില്‍ കോര്‍ത്ത്‌
അളവെടുക്കുന്നുണ്ട്.

ശശിയേട്ടന്റെ പെരുന്നാള്‍ കോള്

2009-09-19T23:43:00.006+05:30

പെരുന്നാളിന്റെ ഓര്‍മ്മകള്‍ കൊണ്ടെത്തിക്കുക കായക്കൊടി എന്ന മനോഹരഗ്രാമത്തിന്റെ വഴിയോരങ്ങളിലാണ്.ഈദ്‌ ഗാഹിന്ടെ ഒരുമയും പുത്തന്‍ കുപ്പായത്തിന്റെ പ്രൌഡിയും ബിരിയാണിയുടെ മണവും കൂടെ മിക്സ്‌ ചെയ്തുള്ള ഒരു പ്രത്യേക സുഗന്ധമാണ് ആ ഓര്‍മ്മകള്‍ക്ക്.ഓര്‍ക്കുന്തോറും മനസ്സിലൊരു സംതൃപ്തിയും നാവില്‍ വെള്ളവും പിന്നെ കണ്ണില്‍ ഒരിറ്റു തുള്ളിയും ഒന്നിച്ചു കൂടുന്ന ഒരവസ്ഥ .
29-ആമത്തെ നോമ്പ് തുറന്നു കഴിയുമ്പോ തുടങ്ങും ആകാംക്ഷയുടെ നിമിഷങ്ങള്‍.പിന്നെ റേഡിയോ യുടെ മുന്നില്‍ ചെവി കൂര്‍പ്പിച്ചിരിക്കും.ചിലപ്പോ തുറക്കുമ്പോ ചെമ്പൈ വൈദ്യ നാഥ ഭാഗവരുടെ അതി ഗംഭീര കച്ചേരി യാകും.എന്നാലും കേട്ടിരിക്കും.അതിനിടയിലെപ്പോഴെന്കിലും ആകും പ്രത്യേക അറിയിപ്പ്-"ഇതു വരെ വിവരമൊന്നും ലഭിച്ചില്ല.അടുത്ത ബുള്ളറ്റിന്‍...."അപ്പൊ കാത്തിരിപ്പിന്റെ ദൈര്‍ഘ്യവും കൂടും.ഒടുവില്‍ മാസം കണ്ടില്ലെന്ന അവസാനത്തെ അറിയിപ്പ് വരുമ്പോ അന്ന് കൂടെ ത റാവീഹ നിസ്ക്കരിക്കണ്ടേ എന്ന ചിന്തയാകും ആദ്യം.പിന്നെ പിറ്റേന്നു രാവിലെ എണീക്കേണ്ട കാര്യം.നാളെ ഉറപ്പിചെന്ന വാര്ത്ത കിട്ടുമ്പോ ഉറക്കെ വിളിക്കാന്‍ തുടങ്ങും തക്ബീര്‍ ധ്വനികള്‍.ചെറിയ പെരുന്നാലാകുമ്പോ വിളിക്കല്പം ശക്തി കൂടും.പിന്നെ പള്ളി യിലേക്കുള്ള പോക്ക്.നോമ്പ് രാവുകളില്‍ പോകുന്നതിനേക്കാള്‍ ആവെശതോടെയാകും പോക്ക്.പള്ളിയില്‍ തക്ബീര്‍ വിളിയും ഇശാ നിസ്ക്കാരവും കഴിഞ്ഞാ പിന്നെ ഫിത്‌ര് സകാത്തിന്റെ അരി വിതരണമാണ്.ഇന്നേറ്റവും നഷ്ട ബോധം തോന്നുന്ന ഒരോര്‍മ്മ കൂടെയാനത്.ടെമ്പോ ലോറിയില്‍ ചെറിയ പാക്കെറ്റുകളാക്കിയ അറിയും കയറ്റി ഞങ്ങളെ ല്ലാവരും ലോറിയുടെ പിറകില്‍ കയറിയുള്ള ആ യാത്ര.തമാശയും സൊറ പരചിലുകളുമായി പല ഗ്രൂപുകളുമായി ആ നാട്ടില്‍ അരി ആവശ്യമുള്ള വര്‍ക്കൊക്കെ എത്തിച്ചു കൊടുക്കുന്ന ആ യാത്ര.അങ്ങനെയൊരു സം ഘടിത സക്കാത്ത് വിതരണത്തില്‍ പിന്നീടെനിക്ക് പങ്കെടുക്കാന്‍ കഴിഞ്ഞിട്ടില്ല. ഓരോ വീട്ടിലും കയറുമ്പോഴും 'പിടി ' എന്ന് വിളിക്കുന്ന പായസം റെഡിയായി നില്‍ക്കുന്നുണ്ടാകും.പെരുന്നാള്‍ തലേന്നത്തെ സ്പെഷ്യല്‍ ആണ് ഈ വിഭവം.മൊത്തം വിതരണം കഴിഞ്ഞു ചിലപ്പോ മൂന്ന് നാല് മണി യൊക്കെ ആകുമ്പോഴാകും ഇറച്ചി വാങ്ങാനുള്ള പോക്ക്.എല്ലാം കഴിഞ്ഞു രാവിലെ എണീറ്റ്‌ പുതിയ കുപ്പായത്തിന്റെ തിളക്കവുമായി ഈദ് ഗാഹിലെ ത്തും.ഈദ് ഗാഹു കഴിഞ്ഞാ അടുത്ത് തന്നെയുള്ള പള്ളി യിലെക്കാവും യാത്ര.കമ്പനി ക്കാരധികവും അവിടെ യാനുണ്ടാവുക. എല്ലാവരും ഒത്തു ചേര്ന്നു ഈദ് മുബാറക്ക്‌ കൈമാറലും കെട്ടിപ്പിടുതവുമൊക്കെ കഴിഞ്ഞാണ് ഞങ്ങളുടെ യഥാര്‍ത്ഥ പെരുന്നാള്‍ ആരംഭം. ഞങ്ങള്‍ ഒരു പത്തോളം പേര്‍ ഗ്രൂപായി പിന്നെ കറക്കം തുടങ്ങുകയായി.മാസ് എന്ന് ഞങ്ങള്‍ സ്നേഹപൂര്വ്വം വിളിക്കുന്ന ഒരു സുഹൃതാവും ഗ്രൂപ്‌ ലീഡര്‍.ആദ്യം കൂട്ടത്തിലുള്ള എല്ലാവരുടെയും വീട് കവര്‍ ചെയ്യും.പിന്നെ ആ നാട്ടിലുള്ള അറിയുന്നതും അറിയാത്തതുമായ എല്ലാ വീടുകളും.കയ്യില്‍ ഒരു കെട്ട് പടക്കം കരുതി വെച്ചിട്ടുണ്ടാകും,ഞങ്ങളുടെ വരവ് ഓരോ വീടുകളിലും അറിയിക്കാന്‍.എല്ലാ വീട്ടില്‍ നിന്നും കാര്യമായി തന്നെ എന്തെങ്കിലും കഴിക്കുകയും ചെയ്യും .ഇത്ര മാത്രം കഴിക്കാനുള്ള കപാസിറ്റി എങ്ങനെ ഒപ്പിച്ചു എന്നത് ഇന്നും അംഞാതമാണ്.ഒരിക്കല്‍ ഒരു സംഭവമുണ്ടായി.നടന്നു നടന്നു എവിടെയൊക്കെയോ എത്തിപ്പോയി. പതിവു പോലെ ഒരു വീട്ടിലെത്തി പടക്കവും പൊട്ടിച്ചു ഉള്ളില്‍ കയരിയിരിപ്പായി .കൂട്ടതിലാര്‍ക്കും അത്ര പരിചയമില്ല ഈ സ്ഥലം .വീട്ടുകാരന്‍ എങ്ങോട്ടോ പോവാനിരങ്ങിയതായിരുന്നു.ഞങ്ങളെ കണ്ടപ്പോ തിരിച്ചു കയറി.വിശേഷങ്ങളൊക്കെ തിരക്കി ഭക്ഷണവും വിളമ്പി.പെരുന്നാള്‍ വീടുകളില്‍ കാണാത്ത വിഭവമായിരുന്നു അവിടെ.പുട്ടും കടലയും.ഒരു വരൈറ്റി ആകട്ടെ എന്നവര്‍ വിചാരിച്ചു കാണും എന്ന് വിചാരിച്ചു ഞങ്ങള്‍ അതും അടിച്ച് കയറ്റി യാത്രയും പറഞ്ഞിറങ്ങി.അയാളും ഞങ്ങടെ കൂടെ ഇറങ്ങി വന്നു.എങ്ങോട്ടാണെന്ന് ചോതിച്ചപ്പോ അടുത്ത വീട്ടില്‍ പെരുന്നാളിന് ക്ഷണമുണ്ടെന്നും ഇന്നു ഭക്ഷണം അവിടെയാണെന്നും.അയാളുടെ പേരു ചോദിച്ചപ്പോഴാണ് കാര്യം പിടികിട്ടിയത്-ശശി .പെരുന്നാളില്ലാത്ത ശശിയേട്ടന്റെ പെരുന്നാള്‍ കോളിന്റെ രുചി ഇന്നും വായില്‍ വെള്ളപ്പൊക്കം തീര്‍ക്കുന്നുണ്ട്.
അങ്ങനെ വീട് സന്ദര്‍ശനം കഴിഞ്ഞു രാത്രി വീടിലെതിയാല്‍ പിന്നെ നല്ല ഒരുറക്കം.തിന്നതിന്റെ ക്ഷീണം തീരും വരെ-പിന്നെ കാത്തിരിപ്പാണ് അടുത്ത പെരുന്നാള് വരെ.

ഏവര്‍ക്കും ഹൃദയം നിറഞ്ഞ ഈദ്‌ മുബാറക്ക്‌.

തരൂരും പോത്ത്‌വണ്ടിയും

2009-09-17T12:30:00.000+05:30

"വിശുദ്ധ പശുക്കളോട് ഐക്യ ദാര്‍ഡ്യം പ്രകടിപ്പിച്ചു തന്റെ അടുത്ത കേരള യാത്ര പോത്ത്‌ വണ്ടിയിലാക്കും"..കോണ്‍ഗ്രസിന്റെ പുതിയ വി ഐ പി അവതാരം ശശി തരൂരിന്റെതാണ് ഈ പരിഹാസ വാക്കുകള്‍. ചെലവു ചുരുക്കല്‍ ചടങ്ങുകളുടെ ഭാഗമായി ഗാന്ധിജിയുടെ പിന്മുറക്കാരോട് സെവെന്‍ സ്ടാറിന്റെ പട്ടു മെത്തയില്‍ നിന്നു ഒരല്പം താഴേക്ക് ഒതുങ്ങിക്കിടക്കാന്‍ പാര്‍ട്ടിയുടെ നിര്ദ്ദേശം വന്നപ്പോള്‍ സായിപ്പിന്റെ സംസ്കാരം മാത്രം ശീലിച്ച തരൂരിനത് പിടിച്ചില്ല. പോത്തിനെയും പശുവിനെയും മേയ്ച്ചു നടക്കുന്ന ജന ലക്ഷങ്ങള്‍ വോട്ടു ചെയ്തു തലസ്താനതെക്കയച്ചതിന്റെ നന്ദി പോത്ത് വണ്ടിയിലുള്ള ജന സമ്പര്‍ക്ക യാത്ര കൊണ്ടു തന്നെ തീര്‍ക്കാമെന്നാകുമോ ...?

പിന്കുറിപ്പ്: "കൊണ്ഗ്രെസ്സിലും വിശുദ്ധ പശുക്കളോ ....?ജനങ്ങളുടെ കണ്ണില്‍ പോടിയിടാനാനെന്കിലും വിശുദ്ധ പശു ചമഞ്ഞു ചിലരെങ്കിലും താമസം സെവെന്‍ സ്റ്റാറില്‍ നിന്നും ഫൈവിലെക്കു മാറ്റിയെന്നാണ് അറിവ്.ഗാന്ധിജിയുടെ പാതയിലേക്കുള്ള തിരിച്ചു പോക്കാകുമോ ....?

അര്‍ജന്റീന പുറത്തേക്ക്..?

2009-09-11T14:54:00.000+05:30

ലോകകപ്പ് ഫുട്ബോളിന്റെ ആരവങ്ങളിലേക്ക് ഇനിയും നാളുകളേറെ.പക്ഷെ കാത്തിരുപ്പിനു മുഷിപ്പുണ്ടാക്കുന്ന രീതിയിലെക്കാണ് കാര്യങ്ങളുടെ പോക്ക്.ലാറ്റിന്‍ അമേരിക്കന്‍ ഫുട്ബാളിന്റെ ദ്രിശ്യ ചാരുത കളിക്കളത്തില്‍ പ്രകടമാക്കുന്ന മറഡോണയുടെ നാട്ടുകാര്‍ മറഡോണയുടെ കീഴില്‍ തന്നെ പുറത്തേയ്ക്കുള്ള വഴികളിലെകാണെന്നു തോന്നുന്നു.തുടര്‍ച്ചയായ മത്സരങ്ങള്‍ തോറ്റ അര്‍ജെന്റിനയ്ക്ക് ഇനി അവശേഷിക്കുന്ന മത്സരങ്ങള്‍ ജയിച്ചാലും സാധ്യത മറ്റു ടീമുകളെ ആശ്രയിച്ചിരിക്കും.ഫുട്ബാളിനെ സ്നേഹിക്കുന്ന ആര്ക്കും ഈ വാര്ത്ത അത്യന്തം വിഷമകരം തന്നെ.റിക്വല്‍മ്യെ-യെ പോലുള്ള ഒരു പ്ലേ-മേക്കറുടെ അഭാവമാണ് അര്‍ജെന്റീന നേരിടുന്ന ഏറ്റവും വലിയ പ്രശ്നം.രിക്വെല്മിയെ ടീമില്‍ തിരിച്ചു കൊണ്ടു വരികയല്ലാതെ ഇനി വിജയ വഴിയില്‍ തിരിച്ചു വരാന്‍ മറ്റു മാര്‍ഗമില്ല.2002 ലോക കപ്പില്‍ പുറത്താകുമെന്ന അവസ്ഥയില്‍ തിരിച്ചു വരികയും ഒടുവില്‍ കപ്പും കൊണ്ടു പോവുകയും ചെയ്ത ബ്രസീലിന്റെ കാര്യം ഓര്‍ക്കുമ്പോള്‍ ചില പ്രതീക്ഷകള്‍ ഇല്ലാതില്ല..

"ഖുര്‍ആനിലെക്ക് ,വെളിച്ചത്തിലേക്ക്"

2009-09-04T15:27:00.000+05:30

''വായിക്കുക,നിന്നെ സൃഷ്‌ടിച്ച
നിന്റെ നാഥന്റെ നാമത്തില്‍..."
ജനസമൂഹങ്ങളെ ഇളക്കി മറിച്ച
വിപ്ലവ കാവ്യങ്ങള്‍
ഇനി
ഹൃദയത്തിന്റെ അരക്ഷിതതത്വത്തില്‍ നിന്നും
അലമാരയുടെ ഭദ്രതയിലേക്ക്.
വെളിച്ചം കൈകളിലേന്തി
ഇരുട്ടില്‍ തപ്പും ജനസമൂഹമേ-
ഒന്നെടുത്തു മറിച്ചു നോക്കുക,
മുന്നില്‍ നയിക്കേണ്ട
സൂചകങ്ങള്‍.
കറ പുരണ്ട കൈകളിലും
ഇരുളടഞ്ഞ ചിന്തകളിലും
ചിതലെടുത്ത സ്വപ്നങ്ങളിലും
ഇനി ,
നാളെയുടെ ലോകം
കേള്‍ക്കാന്‍ കൊതിക്കുന്നു
ഖുര്‍ആന്‍ തുറക്കും
ദൃശ്യ വിസ്മയം.
കാണാന്‍ തുടികുന്നൊരാപ്തവാക്യങ്ങള്‍ .
വസന്ത സ്വപ്നത്തിന്‍
ജനലഴികള്‍ വഴി
ഇനി നമുക്കു മുന്നേറാം.
"ഖുര്‍ആനിലെക്ക് ,വെളിച്ചത്തിലേക്ക്"

റോഡുകള്‍ മൃഗങ്ങള്‍ക്കോ മനുഷ്യര്‍ക്കോ ...?

2009-09-04T11:46:00.005+05:30

അഞ്ചു മണിക്കൂറോളം ബന്ദിപ്പൂര്‍ വനത്തിനരികെ ചൊറിയും കുത്തിയിരിക്കേണ്ടി വന്ന എന്റെ ഒരു സുഹൃത്തിന്റെ അനുഭവ സാകഷ്യമാണ് ഇതെഴുതാന്‍ പ്രേരകം.

കാലാ കാലങ്ങളായി ബാംഗ്ലൂര്‍ മലയാളികളുടെ ആശ്രയമായിരുന്ന മൈസൂര്‍ -ബത്തേരി റോഡില്‍ ബന്ദിപ്പൂര്‍ വനഭാഗത്ത്‌ റോഡ്‌ ഗതാഗതം സ്തംഭിപ്പിച്ച നടപടി തീര്ത്തും പ്രതിഷേധാര്‍ഹം തന്നെ.വന്യ ജീവികളുടെ സ്വൈര്യ വിഹാരത്തെ തടസ്സപ്പെടുത്തുന്നു എന്ന ന്യായം ഉയര്‍ത്തുമ്പോള്‍ എത്ര മനുഷ്യരെയാണ് അത് ബാധിക്കുനത് എന്ന മറു ചോദ്യത്തെ വില വെക്കാത്ത അവസ്ഥയാണ് ഇവിടെ സംജാതമാകുന്നത്. മലബാര്‍ മേഖലയിലേക്ക് കൂടുതലായും പച്ചക്കറി പോലുള്ള പല ചരക്കുകളും കൊണ്ടു പോകാനും തിരിച്ചു മത്സ്യം തുടങ്ങി പല സാധനങ്ങളും ബാന്ഗ്ലൂരില്‍ എത്തിക്കാനും വ്യാപാരികള്‍ ആശ്രയിക്കുന്നത് ഈയൊരു പാതയാണ്.കൂടാതെ ഐ ടി പ്രോഫെഷണലുകളും കച്ചവടക്കാരുമുള്‍പ്പെടെ നിരവധി പേരാണ് ഈ വഴി ദിവസവും കടന്നു പോകുന്നത്. വനവും വന്യ മൃഗങ്ങളും സംരക്ഷിക്കപ്പെടേണ്ടതാണെന്ന കാര്യത്തില്‍ തര്‍ക്കമില്ല. റോഡിനിരുവശവും വേലികള്‍ കെട്ടി അവയെ സംരക്ഷിക്കാവുന്നതാണ്. എന്നാല്‍ മനുഷ്യ ജീവിതത്തിന്റെ വഴ‌ി മുടക്കി തന്നെ വേണം ഈ സംരക്ഷണം എന്നത് അല്പം കടന്ന കൈ തന്നെ .

കുറിപ്പ്: ഇതിനിടയില്‍ കര്‍ണാടക രെജിസ്ട്രേഷന്‍ ഉള്ള ചില വണ്ടികള്‍ എമാന്മാര്‍ക്ക് കൈ മടക്കു കൊടുത്തു തടസ്സങ്ങള്‍ കൂടാതെ കടന്നു പോയെന്ന് സാക്ഷിയായ എന്റെ സുഹൃത്ത്.

ആശങ്കയുടെ ഓണം

2009-09-01T11:35:00.003+05:30

കാണം വില്‍ക്കാന്‍ ചന്തയില്‍ ചെന്നു.
ആസിയാന്റെ ബഹളം കണ്ടു മിഴിച്ചു നിന്നു.
കാണം വഴിയിലെറിഞ്ഞു ഓണം വാങ്ങാന്‍ പോയി.
പൊള്ളുന്ന ചന്ത കണ്ടപ്പോ
ഉണ്ണാതെ തിരിച്ചു പോന്നു.

മലയാളിക്കിത്‌ ആശങ്കയുടെ ഓണം.

ഏവര്‍ക്കും ഹൃദയം നിറഞ്ഞ ഓണാശംസകള്‍.

ഭാരതാംബയുടെ നെന്ചതെക്കൊരു നാണയതുണ്ട്

2009-08-16T21:49:00.000+05:30

ഒന്ന്

ഞാന്‍ സ്വതന്ത്രനാണ്
രാവില്‍
ഈ കടത്തിണ്ണ
ഭൂമിയോളം
കിടപ്പറയൊരുക്കും.
ചവറ്റുകുട്ട
അക്ഷയ പാത്രം
തീര്‍ക്കും .
സ്വപ്നങ്ങളെ
തച്ചുടക്കാന്‍
വരുന്ന
തെരുവ് നായ്ക്കള്‍-
അമ്മയെ കൊല്ലാനുള്ള
അഭിമാനിയുടെ പോരാട്ടം
കണ്ടു
സ്വാതന്ത്ര ദാഹിയായി
എന്‍
കാല്‍ക്കീഴില്‍
മുട്ടുമടക്കും.

രണ്ട്

സ്വതന്ത്രരാണ് ഞങ്ങള്‍ -
പൊടി പിടിച്ച വിപ്ലവകാരികള്‍.
ചിന്തകളെ പതപ്പിച്ച
രക്തവര്‍ണ്ണക്കൊടി
ബൂര്‍ഷ്വാസികള്‍ക്കായ്‌
മുനകൂര്‍ത്തു
ചരിത്രം
തിരിച്ചു കുത്തുമ്പൊഴും.

മൂന്ന്

മൂടുപടം കീറി
ശുക്ല മഴ വര്ഷിചപ്പൊഴും-പിന്നെ
ഗര്‍ഭപാത്രം
പൊളിച്ചു
കുന്തമുനയില്‍
പാതിജീവനെ
കുത്തിയെടുത്തപ്പൊഴും
നിലവിളിച്ചുറക്കെ പറയട്ടെ-
ഞങ്ങള്‍ സ്വതന്ത്രരാണിവിടെ.

നാല്

ഇനി അടുത്ത ബജറ്റ് .
ആസിയാനും
എന്ട് യൂസറും
കഴിച്ചു വല്ല നാണയ തുണ്ടും
ബാക്കിയുണ്ടെങ്കില്‍
ഭാരതാംബയുടെ
നെന്ചതേക്കെറിഞ്ഞു
കൊടുക്കുക-
ചിരിക്കട്ടെ അവളും
സ്വാതന്ത്ര്യത്തിന്റെ
ചിരി.

"വരണ്ട മഴ"

2009-08-07T17:47:00.000+05:30

മഴ പ്രകൃതിയുടെ സംഗീതമാണെന്ന്...

തകര്‍ത്തു
പെയ്യുകയായിരുന്നിവിടെ .
നിറഞ്ഞൊഴുകുന്ന തോടും
കരയില്‍,
ഒരു നാരിനറ്റത്ത്
കൊത്തി വലിക്കുന്ന
മീനിനെ തേടി
ഉപ്പില ചപ്പില്‍
മുടി നനയാതെ കാക്കുന്ന
കളിക്കൂട്ടുകാരും.
കുത്തൊഴുക്കില്‍
ഒലിച്ചിറങ്ങുന്ന
തേങ്ങയിലും മാങ്ങയിലും
ചത്ത കോഴിയില്‍ പോലും
ജീവിതം സ്വപ്നം
കാണുന്നവരുണ്ടത്രേ..

മഴ കിനാവുകളില്‍ ഇടിത്തീയായ് പെയ്യുന്നു...

പെയ്തുകൊന്ടെയിരുന്നപ്പോള്‍
പിന്നെ
ഒന്നു നിന്നിരിന്നെന്കിലെന്നു .
രസിപ്പിചൊടുവില്‍
പിടിച്ചു വലിചൊഴുക്കിക്കളയും-മഴ.
ഒരു തുള്ളിയില്‍
പൂവിട്ടു
പല തുള്ളിയില്‍
പടരുന്ന കിനാവുകളെ
ഒന്നിചൊഴുക്കുന്നൊരു
പിടച്ചില്‍.

വരണ്ട കിനാവുകള്‍

പുഴ കണ്ടത്
അക്ഷരക്കെട്ടുകള്‍ക്കിടയിലാണ്.
കണ്ണില്‍ തടഞ്ഞത്
തീരങ്ങളില്‍ വെയില്‍
കറുക്കുന്നതും
ജലകണങ്ങളില്‍
മണല്‍ തരികള്‍
ഒഴുകി നടക്കുന്നതും.
വയല്‍ വരണ്ടൊടുവില്‍
നെഞ്ച് കരിയാന്‍
തുടങ്ങിയതും - പിന്നെ
ഒരു കയര്‍ തുമ്പ്
ജീവന്റെ വില പറഞ്ഞതും.

ഒടുക്കം

തുടരുകയാണ്
ദുരന്തങ്ങള്‍-
കണ്ണീര്‍ തുള്ളിയില്‍
പൊട്ടിച്ചിരിക്കുന്ന
മനുഷ്യന്റെ
നിസ്സംഗതയും.

ശിഹാബ്‌ തങ്ങള്‍ തീര്‍ക്കുന്ന വിടവ്....

2009-08-03T14:43:00.000+05:30

മൂര്‍ച്ചയേറിയ
വാക്കുകള്‍
ആള്‍ക്കൂട്ടത്തെ
സൃഷ്ടിച്ചേക്കാം.
വാക്കുകള്‍
നിലയ്ക്കുമ്പോള്‍
താളുകള്‍ പതിയെ
അടയാന്‍ തുടങ്ങും.
മൌനങ്ങളാല്‍,
ചിലപ്പോള്‍
മൃദുല വാക്കുകളാല്‍
സൌമ്യ ഭാവങ്ങളാല്‍
സമൂഹത്തെ
പിടിച്ചുകുലുക്കന്നവരത്രേ
യഥാര്‍ത്ഥ വിപ്ലവകാരികള്‍.
കേരള രാഷ്ട്രീയം
ഇനി കാണുന്ന
വിടവ്
ഒരുമയുടെ
ഈ നിത്യ ഹരിത
ഭാവങ്ങളാണ്.
തങ്ങളുടെ ഓര്‍മകള്‍ക്ക്
മുന്നില്‍
ഒരു തുള്ളി
കണ്ണീര്‍ പൊഴിച്ചു കൊണ്ടു....

....ചില ക്യാമ്പസ്‌ ചിത്രങ്ങള്‍...

2009-07-07T18:05:00.001+05:30

നാലു കൊല്ലത്തെ കോളേജ് ജീവിതം തീര്ത്തു വെച്ച ചില ചിത്രങ്ങള്‍

കാല്‍വെയ്പ്:

കുറെ മുഖങ്ങള്‍
ചിന്തയിലാന്ടവ,
പല്ലുകള്‍ കാട്ടാതെ
ചിരിക്കുന്നവ,
കാല്‍വെയ്പില്‍ കണ്ടതിവയാണ്.
ചില കണ്ണുകള്‍
കലങ്ങിയിരിക്കുന്നു.
മറ്റു ചിലത് മിഴിച്ചു നില്‍ക്കുന്നവ.

ക്ലാസ്സ്‌ മുറി :

ആദ്യ ബെന്ചിനായുള്ള മത്സരം.
നിരാശപ്പെട്ട് പിന്നിലായവര്‍.
കടല്‍ കയ്കുംബിളിലൊതുക്കാന്
പാച്ചിലുകള്‍.
തിര പോലും കയ്യില്‍ തടയാതെ
വന്നപ്പോള്‍
പിന്നില്‍
തിര തോല്‍ക്കും പ്രളയം.

പ്രണയം :

വട്ടക്കന്നട വെച്ച
മുടി ചീകിയൊതുക്കിയ
മുന്നിലെ പുസ്തകത്തില്‍
എത്തി നോക്കുന്നതിനിടെ
കണ്ണ് തെറ്റി
കാണാന്‍ തുടങ്ങി-നിന്നെ
നീ അറിഞ്ഞില്ലെങ്കിലും .
കണ്ണുകളടയാതിരുന്നത്
നിനക്കു വേണ്ടിയാണ്,
എന്തെങ്കിലുമൊക്കെ
കുത്തിക്കുറിച്ചതും .
പിന്നെയെപ്പൊഴോ
അക്കേഷ്യാ തണലുകളില്‍
നിന്റെ ചുടു നിശ്വാസങ്ങലാല്‍
ഇലകsളനന്ങാന്‍ തുടങ്ങിയത്
ദൂരെ നിന്നും
നോക്കി കണ്ടു ഞാന്‍.
അവിടെ മരിക്കുന്നു പ്രണയം-
തുടര്ച്ചകളില്ലാതെ..

സമരം :

തൊണ്ട കീറി മുഴക്കിയ
മുദ്രാവാക്യങ്ങള്‍ .
തോളില്‍ കയ്യിട്ടു നടന്ന
സുഹൃത്തിനെ ചവിട്ടിയരച്ച
വിപ്ലവ ബോധം .
ഇന്നോര്‍ക്കുമ്പോള്‍ എല്ലാം
ഒരു ചിരിയിലോതുങ്ങുന്നു .
പാര്‍ട്ടിയും സമരവും
ശുഭ്ര പതാകയും
അതിലെ നക്ഷത്രവും.

ഹോസ്റ്റല്‍ :

ഉറങ്ങി തകര്‍ത്ത
പകലുകള്‍ .
കുടിച്ചും പുകച്ചും തള്ളിയ
രാവുകള്‍ .
കോളേജിന്‍ പടി കണ്ട
സമര നാളുകള്‍ .
ഒരുപാടു വിയര്‍പ്പു കണങ്ങളും
ഒരു തരം ഗന്ധവും
ഏറ്റു വാങ്ങി
അടുത്തയാള്‍ക്കു മറയേകാനൊ-
രുങ്ങുന്ന ഒരുകൂട്ടം ഷര്‍ട്ടുകള്‍,പാന്റുകള്‍ ..
ഉറക്കത്തില്‍ പോലും
കടന്നാക്രമിക്കുന്ന
മെസ്സിലെ കല്ലുകടികള്‍ .
പ്രായത്തിന്റെ വളര്ച്ചകളെ
ആനന്ദത്തിന്റെ തളര്ച്ചയാല്‍ നേരിടാന്‍
സ്ക്രീനില്‍ തെളിയുന്ന
നഗ്ന ചിത്രങ്ങള്‍ .

യാത്രാമൊഴി :

കാല്‍വെയ്പിലെ വ്യാകുലതകള്‍.
ക്ലാസ്സ്‌ മുറിയിലെ തിരയിളക്കങ്ങള്‍.
പ്രണയം തീര്‍ത്ത കലങ്ങി മറിയലുകള്‍.
സമരത്തിന്റെ നിര്‍വൃതി .
ഹോസ്റ്റലിന്റെ നഗ്ന സന്തോഷങ്ങള്‍.
കണ്ണുകള്‍ നനയാന്‍
ഇതില്‍ കൂടുതലെന്തു...?

ഭീകരവാദി

2009-07-06T22:50:00.000+05:30

(മുമ്പ് പബ്ലിഷ് ചെയ്തതാണ്..പുതിയ പേരില്‍ വീണ്ടും )

കുതിച്ചുയരുന്നതും തകര്‍ന്നടിയുന്നതും......

2009-06-05T04:07:00.000+05:30

''ആദ്യം ഉയരാന്‍ തുടങ്ങും...
പിന്നെ വളരാനും.....
ഒടുവില്‍ തളരും....
പിന്നെ തകര്‍ന്നടിയും..... ''
ജീവിതം പഠിപ്പിച്ച പാഠങ്ങളാണ്....
ജീവിച്ചു തീര്‍ത്തയോരോ നിമിഷങ്ങളും.....
** ** ** **
ഉയരുന്നു
പിന്നെ ഞാന്‍ സ്വപ്നം കാണാന്‍ തുടങ്ങി
(മലര്‍പ്പൊടിക്കാരന്റെ പകല്‍ക്കിനാവുകള്‍ )
ഉയരാന്‍ തുടങ്ങിയത് -
വാനോളം ,അതിനുമപ്പുരവും ....

വളരുന്നു
കുറെയേറെ ഗുണിചെടുക്കാന്‍ തുടങ്ങി
അതിലേറെ ഹരിക്കാനും...
അന്ത്യം ഒരുപാടു പൂജ്യങ്ങള്‍ ....
മുമ്പിലെവിടെയോ ഒന്നുന്ടാവുമാകും....
ഊഹങ്ങളാണിവ ....
കടലിനപ്പുരമുള്ള കാഴ്ചകള്‍
മനോഹരമത്രേ....
എന്റെ കണ്ണില്‍ കാണാമത്....
ഹൃദയം കൊണ്ടറിയുമത് ...
വിരലാല്‍ തഴുകുമത്.....

തളരുന്നു
എല്ലാം കുമിളകളത്രെ....
കടലിനപ്പുരം കണ്ടതും കേട്ടതും തൊട്ടരിഞ്ഞതുമെല്ലാം.....
ഒരു തുള്ളി പതിയെ നെഞ്ചോടു ചേര്‍ത്തു...
ഒരു കടല്‍ തന്നെ ഹൃദയത്തില്‍ എരിയാന്‍ തുടങ്ങി ...

തകര്‍ന്നടിയുന്നു
ഒടുവില്‍ കുഴി വെട്ടാന്‍ തുടങ്ങി
കേട്ടിപ്പൂട്ടിയ നാളെകളില്‍
മണ്ണിട്ട് മൂടാനും...
മുകളില്‍ ഊഹക്കണക്കുകളുടെ
മീസാന്‍ കല്ല്‌ ...
വാനോളവും അതിനപ്പുരവും
വളരുന്ന ഒരു ചെടിത്തണ്ടും-
ഇന്നലെകളുടെ ഓര്‍മ്മയ്ക്കായ് .....

ചുരുള്‍ക്കാഴ്ചകള്‍-2

2009-05-17T12:15:00.000+05:30

ആറ് : തിരഞ്ഞെടുപ്പ് ഫലങ്ങള്‍ പുറത്തു വന്നിരിക്കുന്നു. പ്രതീക്ഷകള്‍ക്കുമപ്പുരം കോണ്‍ഗ്രസ്സ്‌ തരംഗം ആഞ്ഞടിച്ചിരിക്കുന്നു ഇന്ത്യ മുഴുവന്‍... വര്‍ഗീയ കക്ഷികളെ അകറ്റാന്‍ ഇന്നത്തെ സാഹചര്യത്തില്‍ കോണ്‍ഗ്രസിന്‌ മാത്രമെ കഴിയൂ എന്ന തിരിച്ചറിവാകണം ജനങ്ങള്‍ കോണ്‍ഗ്രസില്‍ അര്‍പിച്ച ഈ വിശ്വാസം. ശക്തമായ സാമ്രാജ്യത്വ വിധേയത്വതിലധിഷ്ടിതമായ ഒരു ഭരണത്തിന് പകരം ഇന്ത്യയുടെ അഭിമാനവും അന്തസ്സും കാത്തു സൂക്ഷിക്കുന്ന രീതിയില്‍ ഇനിയൊരന്ജു വര്‍ഷം ഭരിക്കാനുള്ള തിരിച്ചറിവ് കോണ്‍ഗ്രസിന്‌ ഉണ്ടാവുമെന്ന് നമുക്കു പ്രതീക്ഷിക്കാം .അങ്ങനെയെങ്കില്‍ നെഹ്‌റു യുഗത്തിലെക്കാവും കോണ്‍ഗ്രസിന്റെ തിരിച്ചു പോക്ക് .
കോണ്‍ഗ്രസിന്റെ വിജയത്തേക്കാള്‍ ശ്രദ്ധേയമാണ് ഇടതു കക്ഷികള്‍ക്കേറ്റ തിരിച്ചടി. തൊഴിലാളി വര്‍ഗങ്ങളുടെ വിയര്‍പ്പു കണങ്ങളില്‍ പടുതുയര്‍ത്തപ്പെട്ട പ്രസ്ഥാനം സ്വാര്‍ത്ഥ താല്‍പര്യങ്ങളുടെ പേരില്‍ ആ ജനതയെ തന്നെ കൈവിടാന്‍ തുടങ്ങിയപ്പോള്‍ സാധാരണക്കാര്‍ക്ക് കോണ്‍ഗ്രെസ്സല്ലാതെ മറ്റൊരു രക്ഷയുമില്ലായിരുന്നു. ആണവ കരാറിനെതിരെ വളരെ ശക്തമായ നിലപാടെടുതപ്പോഴും നന്ദിഗ്രാമും ചെങ്ങറയും ഒടുവില്‍ ലാവലിന്‍ തര്‍ക്കങ്ങളും ജനങ്ങള്‍ വിഡ്ഢികളല്ലെന്ന ശക്തമായ താക്കീതാണ് ഇടതു കക്ഷികള്‍ക്ക് നല്കുന്നത്. സാമ്രാജ്യത്വത്തോടുള്ള ഒളിച്ചുകളിയും ഇടതു നിന്നു കൊണ്ടുള്ള വലതു പക്ഷ ചായ്‌വും ഒഴിവാകിടാത്ത കാലത്തോളം ജന മനസ്സില്‍ ഇനി ഇടതിന് സ്ഥാനമുണ്ടാകില്ല .

തിരഞ്ഞെടുപ്പ്

2009-04-12T23:28:00.000+05:30

ഈ വിരല്‍ തുംബിലത്രേ ജനാധിപത്യം പൂത്തുലയുന്നത്-
ഒരു കറുത്ത പാടില്‍ .....
പിന്നെ സീറ്റ് തര്‍ക്കം ,കസേരകളി ,കുതികാല്‍വെട്ട്‌....
ഇടക്കോരോ പ്രസ്താവനകള്‍ ...
ഉച്ചകോടികള്‍ ... സമാധാന സന്ദേശങ്ങള്‍ .....

മഷി പതിയെ പുരളാന്‍ തുടങ്ങും-
കയ് നിറയെ ....
നോട്ടു കെട്ടുക ളെ ണ്ണി തീരുമ്പോള്‍ കറ പിടിക്കുമത്രേ....
കറുത്ത നിറം ....
ഒരു കുത്തല്ല , ഒരായിരം കുത്തുകള്‍...
പക്ഷെ ഒന്നുണ്ട്
മായ്ച്ചു കളയാന്‍ എളുപ്പമാണീ കറ ...
അടുത്ത ഇലക്ഷന്‍ വരുമെന്നറിയുമ്പോള്‍ ഒരു മുതലക്കണ്ണീര്‍;
ഒരു പത്ര സമ്മേളനം .
പിറ്റേന്നു കുറ്റവിമുക്തനെന്നൊരു നോട്ടീസും ..

ഇതാണ് ജനാധിപത്യം....
ആരാണ് വിഡ്ഢികള്‍....
കറുത്ത മഷിയില്‍ രാഷ്ട്രം പടുക്കുന്ന ജനമെന്ന കഴുതയോ...
അവരില്‍ രാമരാജ്യം സ്വപ്നം കണ്ട ഗാന്ധി തന്‍ ദര്‍ശനങ്ങലോ.....

ഉത്തരം തേടുമ്പോള്‍
സത്യവാചകം മുഴങ്ങാന്‍
തുടങ്ങും .
അടുത്ത നാടകം തുടങ്ങുകയായി .
ഇനിയൊരു തിരഞ്ഞെടുപ്പിനന്കമോരുങ്ങും വരെ .

ചുരുള്‍ക്കാഴ്ചകള്‍ .......

2009-03-09T13:50:00.000+05:30

അഞ്ച് : ഐ പി എല്‍ ജ്വരമായി പടരുകയാണ്. ക്രിക്കെടിനോട് പണ്ടുള്ള ഭ്രാന്തന്‍ സമീപനമോന്നുമില്ലെന്കിലും ഐ പി എല്‍ ഒരു രസമാണ്. കഴിഞ്ഞ വര്‍ഷം ഏകദേശം എല്ലാ കളിയും തോറ്റെങ്കിലും ഡക്കാന്‍ ചാര്‍ജര്‍സിന് തന്നെ ഇക്കുറിയും പിന്തുണ. ചെന്നൈ ശക്തമായ ടീമും ഡല്‍ഹി കിരീടം നേടാന്‍ സാധ്യത ഉള്ള ടീമുമാണെന്നു തോന്നുന്നു . കാത്തിരുന്നു കാണാം .

നാല് : തിരഞ്ഞെടുപ്പ് കാലമാണിത്.ഒരു രാഷ്ട്രീയ പാര്‍ട്ടിയോടും ആശയപരമായി താല്പര്യമില്ലെന്കിലും രാഷ്ട്രീയം പറഞ്ഞിരിക്കല്‍ രസകരമാണ് .കേരളത്തിലെ പ്രക്ഷുബ്ധമായ രാഷ്ട്രീയ ചര്‍ച്ചകളില്‍ മുഴുവന്‍ നിറയുന്നത് മദനിയും മതമൌലിക ശക്തികളും അവയുടെ കൂട്ടുകെട്ടുകളും തന്നെ . മാധ്യമങ്ങള്‍ തകര്താടുകയാണ്‌ ഓരോ രംഗങ്ങളും. മദനി ഭീകര വാദിയാണോ അല്ലയോ എന്ന ചര്‍ച്ചയില്‍ കേരള രാഷ്ട്രീയം ഒതുങ്ങിക്കൂടുമ്പോള്‍ കാണേണ്ട പല കാഴ്ചകളും നാം കാണാതെ പോകുന്നു . വിലക്കയറ്റവും സാമ്രാജ്യത്വവും ഭീകരാക്രമണങ്ങളും ഫാഷിസ്റ്റ്‌ ഭീകരതകളും നാം മറന്ന മട്ടാണ് . ഇവിടെയാണ്‌ രാഷ്ട്രീയം എന്നത്തേയും പോലെ വിജയിക്കുന്നത്, തിരഞ്ഞെടുപ്പിന് മുമ്പു തന്നെ .

മൂന്ന്: ഭീകരതയാണിന്നിന്റെ പ്രശ്നം . മതമോ ജാതിയോ നോക്കാതെ, സ്വന്തം അയല്‍ക്കാരനെ പട്ടിണിക്കിടുന്നവന്‍ നമ്മില്‍ പെട്ടവനല്ലെന്നു പറഞ്ഞ ഒരു പ്രവാചകന്റെ അനുയായികള്‍ മതത്തിന്റെ പേരില്‍നടത്തുന്ന അതിക്രമങ്ങളെ അപലപിച്ചേ മതിയാകൂ .ഇസ്ലാം ഒരിക്കലും ഭീകരതയെ പ്രോത്സാതിപ്പിക്കുന്നില്ലെന്നു മാത്രമല്ല , ഒരു നിരപരാധിയെ കൊന്നവന്‍ ഒരു സമൂഹത്തെ മുഴുവന്‍ കൊന്നവന് തുല്യനാനെന്നാണ്‌ അതിന്റെ നിലപാട് . സ്വന്തതോടുള്ള ധര്‍മ്മ സമരമാണ് ജിഹാദിന്റെ ആദ്യപടി .

രണ്ട് : " ഒരു മഹാ മൌനവും രണ്ട് മൌനങ്ങള്‍ക്കിടയിലെ നാദവുമാണ് ഓംകാരം ." ഓസ്കാര്‍ വേദിയില്‍ റസൂല്‍ പൂക്കുറ്റി എന്ന മുസ്ലിം യുവാവ് ഇങ്ങനെ വിളിച്ചു പറഞ്ഞപ്പോള്‍ അവിടെ പ്രതിധ്വനിക്കുന്നത് മത സൌഹാര്‍ദ്ത്തിലധിഷ്ടിതമായ ഇന്ത്യന്‍ സംസ്ക്കാരം കൂടെയാണ് . നാണിച്ചു പോകുന്നത് നമ്മെ നയിക്കേണ്ട നമ്മുടെ മേലാളന്മാരും . ബുഷിന്റെ ചെരിപ്പു നക്കി ഒടുവില്‍ " ബുഷ് , നിന്നെ ഇന്ത്യന്‍ ജനത ആദരിക്കുന്നു " എന്ന് ഉളുപ്പില്ലാതെ വിളിച്ചു പറഞ്ഞ മന്‍മോഹന്‍ സിംഗ് തല താഴ്ത്തണം ഈ വാക്കുകളില്‍ .

ഒന്ന്: മഴയിലും പുഴയിലും പൂവിലും കാറ്റിലും സംഗീതം നിറച്ചു വെച്ചത് ദൈവമാണ് . മഴയെ രാഗമായ് പെയ്യിക്കാന്‍ , ഖാര്‍ഗ്ര്ങില്‍ താളമായ് ആഞ്ഞടിക്കാന്‍ , പുഴയില്‍ നേര്‍ത്തൊരു സ്വരം തീര്‍ക്കാന്‍ ..... ഹൃദയത്തില്‍ ദൈവത്തിന്റെ കയ്യൊപ്പുള്ള ഒരാള്‍ക്കേ ഇതിനൊക്കെ കഴിയൂ ... അതാണ്‌ റഹ്മാന്‍ .....

ചെരുപ്പ്

2009-03-08T00:15:00.000+05:30

ഒന്ന് - ഇരയുടെ മൌനം

ചെരിപ്പുകള്‍ കാലുകള്‍ക്കൊരു കരുതലാണ് -

മുള്ളും കൊള്ളിയും തരക്കരുതെ എന്ന് പറഞ്ഞ്

കാലില്‍ ആദ്യമായി ചെരിപ്പിട്ടതും -പിന്നെ

പതിയെ വേച്ച് വെച്ചതൊരു ശീലമായതും ........

രണ്ട് - വേട്ടക്കാരന്റെ അലമുറകള്‍

ഒരു കൂട്ടം ചെരിപ്പുകളുണ്ട് വേട്ടക്കാരന്

ഇരകളുടെ രക്തമൂറ്റി കാലില്‍ പ്രതിഷ്ടിച്ചവ

കല്ലും മുള്ളും കൊള്ളിയും

ഇരയുടെ ഹൃദയത്തില്‍ തറച്ച്

വള്ളികള്‍ തീര്‍ത്തവ.....

മൂന്ന് - വേട്ടയുടെ അവസാനം
ഇരയുടെ വേട്ടയ്ക്ക് പ്രായോജകരില്ല
രക്തമൂറ്റിക്കുടിക്കാന്‍ യന്ത്രങ്ങളുമില്ല
കാതങ്ങളോളം തഴമ്പിച്ച
ആരവങ്ങളുണ്ട്-അവ
നെഞ്ചേറ്റിയ ഒരു കൂട്ടം
ചെരിപ്പുകളുമുണ്ട്.
മുഖം കൊള്ളെ ചെരിപ്പുകള്‍
പതിക്കുമ്പോള്‍
ആരുമൊന്നു വിറക്കും .
കാല്‍ക്കീഴില്‍ ലോകം മുഴുവന്‍ പടച്ചു വെച്ചവന്‍ പോലും .
ഒടുവില്‍ വേട്ടക്കാരന്‍ മുട്ട് മടക്കുന്നൊരു കാലം വരും ...
ചെരുപ്പില്‍ തഴമ്പിച്ച ആരവങ്ങളൊന്നായി
പ്രഹരങ്ങളായി പതിക്കും കാലം ...